தமிழகத்தைச் சேர்ந்த இக்னேசியஸ் டெலோஸ் புளோரா , இவர் ராணுவத்தில் நர்சிங் பிரிவில் மேஜர் ஜெனரலாக பதவி உயர்வு பெற்றுள்ளார். இவருக்கு முதல்வர் மு.க.ஸ்டாலின் வாழ்த்து தெரிவித்தார்.இது தொடர்பாக முதல்வர் மு.க.ஸ்டாலின் வெளியிட்ட டுவிட்டர் பதிவில், பெண்களால் முன்னேறக் கூடும் – நம் வண்தமிழ் நாடும் எந்நாடும். மேஜர் ஜெனரல் இக்னேசியஸ் டெலோஸ் ஃப்ளோராவின் சிறப்பான சாதனைக்கு வாழ்த்துகள்! தமிழ்நாட்டின் கன்னியாகுமரியைச் சேர்ந்த முதல் பெண்மணி மேஜர் ஜெனரல் பதவியை எட்டியது மிகச்சிறந்த மைல்கல். அவரின் பணிக்கும் சேவைக்கும் ஆர்வத்திற்கும் மரியாதைக்குரிய வணக்கங்கள் எனக் குறிப்பிட்டு இருந்தார்.
முதல்வர் மு.க. ஸ்டாலின் மறுபகிர்வு செய்து வெளியிட்டிருந்த இந்த வாழ்த்து செய்தியை இந்திய ராணுவம் நீக்கியுள்ளது. இந்த குறித்து திமுக எம்.பி. கனிமொழி வெளிட்டுள்ள டுவிட்டர் பதிவில், தமிழ்நாடு முதல்-அமைச்சர், தனது மாநிலத்திலிருந்து முதல் பெண்மணியாக மேஜர் ஜெனரல் பதவி உயர்வு பெற்றிருப்பவருக்கு வாழ்த்திய பதிவை ராணுவம் ஏன் நீக்க வேண்டும்? இதன் பின்னணி என்ன? என கேள்வி எழுப்பியுள்ளார்.
ராணுவத்தின் இந்த செயல் தமிழக மக்கள் மத்தியில் பெரும் அதிர்ச்சியையும், கோபத்தையும் ஏற்படுத்தி உள்ளது. ஒட்டுமொத்த தமிழ் மக்களின் முதல்வராக இருக்கும் ஸ்டாலின், ஒரு தமிழ்ப்பெண்ணின் சாதனையை பாராட்டிய ட்விட்டை ராணுவம் ஏன் நீக்கியது.? என்பது விந்தையாக இருக்கிறது. ராணுவத்திற்கு இந்த உத்தரவை பிறப்பித்தது யார்? அல்லது ராணுவமே இப்படிப்பட்ட காரியங்களை செய்கிறதா என அறிய விரும்புவதாக திமுக தொண்டர்கள் கொந்தளிப்புடன் கேள்விகள் எழுப்பி உள்ளனர்.