வரும் 31-ம் தேதி தீபாவளி பண்டிகையை முன்னிட்டு பாதுகாப்பு காரணங்களுக்காக திருச்சி தெப்பகுளம் பகுதியில் திருச்சி மாநகர கமிஷனர் காமினி புற காவல் நிலையத்தினை திறந்து வைத்தார்.
அதனைதொடர்ந்து நிருபர்களிடம் கூறியதாவது.. திருச்சி மாநகர பகுதிகளில் இலகுரக, மற்றும் கனரக வாகனங்கள் பகல் நேரங்களில் சரக்குகள் ஏற்றுவது மற்றும் இறக்குவதை தவிர்த்து இரவு 11.00 மணிக்கு மேல் அவர்களது பணிகளை செய்து கொள்ளுமாறும், மாநகராட்சி அதிகாரிகளுடன் கலந்தாய்வு செய்து தற்காலிக சாலையோர கடைகளை முறைப்படுத்தி போக்குவரத்து நெரிசலை குறைக்கவும், அரசு போக்குவரத்து கழக கிளை மேலாளர்கள் மற்றும் தனியார் பேருந்து உரிமையாளர்களுடன் கலந்து பேசி போக்குவரத்தை முறைபடுத்தவும், பொதுமக்கள் சிரமமின்றி தங்களது தேவைகளை நிறைவேற்றி கொள்ளும் வகையில் காவல் துறை சார்பில் உரிய நடவடிக்கை எடுக்கப்படும்.
தீபாவளி பண்டிகையை ஒட்டி புத்தாடைகள் மற்றும் பொருள்கள், வாங்க வரும் பொதுமக்கள் அவர்களுடன் அழைத்து வரும் குழந்தைகளையும், உடமைகளையும் பாதுகாக்கும் விதமாகவும், சந்தேகப்படும்படியான நபர்கள் பற்றிய தகவல்களை போலீசாருக்கு தெரிவிக்கும் விதமாகவும், பாதிக்கப்படும் பொதுமக்கள் தங்களது குறைகள் தொடர்பாக புகார் கொடுக்கவும் என்எஸ்பி ரோடு தெப்பக்குளம் அருகில் தற்காலிக காவல் உதவி மையம் அமைக்கப்பட்டுள்ளது.
மேலும் சத்திரம் பேருந்து நிலையம் மற்றும் மத்திய பேருந்து நிலையங்களில் பொது அறிவிப்பு மையம் மற்றும் கண்காணிப்பு கேமராக்கள் அமைக்கப்பட்டு காவலர்கள் மூலம் 24 மணி நேரமும் சுழற்சி முறையில் தொடர்ந்து கண்காணித்து குற்றச் சம்பவங்கள் நிகழா வண்ணம் தடுக்க நடவடிக்கை எடுக்கப்பட்டுள்ளது என இவ்வாறு தெரிவித்தார்.