வணிக நிறுவனங்கள் வாடகை கட்டிடத்தில் இயங்கினால், அந்த வாடகைக்கும் 18 சதவீத ஜி.எஸ்.டி- வரி விதிக்கப்பட்டுள்ளது. வியாபாரிகளுக்கு பெரும் பாதிப்பு ஏற்பட்டுள்ள இந்த ஜிஎஸ்டி வரியை கண்டித்து திருச்சியில் இன்று பிஎஸ்என்எல் அலுவலகம் முன்பு வணிகர் சங்கங்களின் பேரமைப்பு சார்பில் ஆர்ப்பாட்டம் நடந்தது. மாநில பொதுச் செயலாளர் கோவிந்தராஜூலு தலைமை தாங்கினார்.
திருச்சி மண்டல தலைவர் எம்.தமிழ்ச்செல்வம், திருச்சி மாவட்ட தலைவர் வி.ஸ்ரீதர், திருச்சி மாநகர தலைவர் எஸ்.ஆர்.வி. கண்ணன் மற்றும் மாநில துணைத்தலைவர்கள், மாநில இணைச்செயலாளர்கள், இளைஞர் அணி நிர்வாகிகள் முன்னிலை வகித்தனர்.
போராட்டம் குறித்து மாநில பொதுச் செயலாளர் கோவிந்தராஜூலு நிருபர்களிடம் கூறியதாவது:-
ஜி.எஸ்.டி. எனப்படும் சரக்கு மற்றும் சேவை வரிச் சட்டம் கடந்த 2017ம் ஆண்டு மத்திய அரசால் அறிமுகப்படுத்தப்பட்டது. அறிமுகப்படுத்தப்பட்ட நாள் துவங்கி தற்போது வரை பல்வேறு குழப்பங்களுடனே இச் சட்டம் செயல்பாட்டில் இருந்து வருகிறது. இதனை மெய்பிக்கும் வகையில் அறிமுகப்படுத்தப்பட்ட நாள் துவங்கி
தற்போது வரை ஜி.எஸ்.டி. வரி விதிப்பில் நூற்றுக்கும் மேற்பட்ட மாற்றங்கள் செய்யப்பட்டுக்கொண்டே வருகின்றன.
ஆடிட்டிங் படித்த கணக்காளரும், கம்ப்யூட்டரும் இல்லாமல் ஜி.எஸ். டி.ஐ பராமரிக்க முடியாது என்பது ஜி.எஸ்.டி.யின் சாதனைகளில் ஒன்று. இச் சூழ்நிலையில் எவற்றிற்கெல்லாம் வரி இல்லை, அல்லது குறைவாக இருக்கிறது என்பதை தேடித் தேடி வரி விதிக்கும் நிலை உருவாகி இருக்கிறது.
அந்த வகையில் தற்போது வணிக கட்டிடங்களில் வணிகம் செய்து வரும் வணிகர்கள் இனி தாங்கள் செலுத்தும் வாடகையுடன் கூடுதலாக 18 சதவீதம் ஜி.எஸ்.டி. வரி சேர்த்து செலுத்த வேண்டும் எனவும், இது 10.10.24 முதல் அமலுக்கு வந்துள்ளதாகவும் மத்திய அரசு அறிவித்துள்ளது.
வணிகர்களில் 90 சதவீதம் பேர் வாடகை கட்டிடத்தில் வணிகம் செய்து வரும் நிலையில் மத்திய அரசின் இவ் அறிவிப்பு மிகப்பெரிய பேரதிர்ச்சியை ஏற்படுத்தி உள்ளது. நாடு முழுவதும் உள்ள வணிகர்கள் இவ் அறிவிப்பை திரும்ப பெற வலியுறுத்தி பல்வேறு வகையான போராட்டங்களை முன்னெடுத்து வருகின்றனர்.
வாடகையுடன் 18 சதவீதம் ஜி.எஸ்.டி. என்பதை தமிழ்நாடு வணிகர் சங்கங்களின் பேரமைப்பு கடுமையாக எதிர்கின்றது. வணிகர்களின் எதிர்ப்பு குரலுக்கு மத்திய அரசு மதிப்பளிக்க தவறியதால் பேரமைப்பு சார்பில் பல்வேறு கட்ட போராட்டங்களை மேற்கொள்வது என முடிவு செய்யப்பட்டுள்ளது.
அதன்படி முதற்கட்டமாக மாநிலம் முழுவதும் உள்ள மாவட்ட தலை நகரங்களில் இன்று (புதன்கிழமை) கண்டன ஆர்ப்பாட்டம் நடைபெற்றது.அந்த வகையில் திருச்சியில் தலைமை தபால் நிலையம் பின்புறம் உள்ள பி.எஸ்.என்.எல். அலுவலகம் அருகே எனது ( மாநில பொதுச்செயலாளர் வீ.கோவிந்தராஜுலு ) தலைமையில், கண்டன ஆர்ப்பாட்டம் நடைபெற்றது. வாடகைக்கு ஜி.எஸ்.டி. என்று வணிகர்களை வாட்டி வதைக்கும் இவ் அறிவிப்பை திரும்ப பெற வேண்டும் என்ற கோரிக்கையை வலியுறுத்தி ஆர்ப்பாட்டம் நடைபெற்றது. கோரிக்கை நிறைவேறாவிட்டால் வியாபாரிகளை திரட்டி மாபெரும் கடையடைப்பு போராட்டம் நடத்தப்படும்.இவ்வாறு கோவிந்தராஜுலு கூறினார்.
இந்த கண்டன ஆர்ப்பாட்டத்தில் மாநில துணைத்தலைவர்கள் எஸ்.கந்தன்,கே எம் எஸ் ஹக்கீம், ரங்கநாதன்,தொட்டியம் செல்வராஜ், மாநில இணை செயலாளர்கள் கமலக்கண்ணன், ஸ்ரீ ராமகுமார், ராஜாங்கம், திருப்பதி,திருச்சி மாவட்ட செயலாளர் செந்தில் பாலு ,திருச்சி மாவட்ட பொருளாளர் வெங்காய மண்டி தங்கராஜ்,மாநகர செயலாளர் ஏ ஒன் ஹோட்டல் ஆறுமுகப்பெருமாள்,மாநகரப் பொருளாளர் ஜானகிராமன்,
திருச்சி மாவட்ட இளைஞரணி தலைவர் அப்துல் ஹக்கீம்,செயலாளார் கார்த்திக்,பொருளாளர் பிரசன்னன்,திருச்சி மாநகர இளைஞரணி தலைவர் கே. எம் .எஸ் மைதீன்,செயலாளர்செய்தி தொடர்பாளர் திருமாவளவன்,பொருளாளர் அப்பாத்துரை, டோல்கேட் ரமேஷ்,மற்றும் அனைத்து தரப்பு வியாபாரிகள் ஆயிரத்துக்கும் மேற்பட்டோர் கலந்து கொண்டனர்.