திருச்சி காஜாமலை பகுதியில் அமைந்துள்ள தந்தை பெரியார் அரசு கலை மற்றும் அறிவியல் கல்லூரியின் முன்னாள் மாணவர்கள் சங்கத்தின் 20-ம் ஆண்டு விழா, தந்தை பெரியாரின் 145வது பிறந்தநாள் விழா, முன்னாள் மாணவர்களின் சங்கம விழா ஆகிய முப்பெரும் விழா நடைபெற்றது.
கல்லூரி வளாகத்தில் நடந்த இவ்விழாவில் முன்னாள் மாணவர் சங்கத்தின் புரவலர் திருச்சி சிவா எம்.பி. நெகிழ்ச்சியுரை ஆற்றினார்.
அதில், இக்கல்லூரியில் படித்த மாணவர்கள் பலர் அரசு துறைகளில் அதிகாரிகளாக பணியாற்றி வருகிறார்கள். அதுபோல நீதிபதிகளாக, பல்கலைக்கழக துணைவேந்தர்களாக, பேராசிரியர்களாக, சட்டமன்ற, பாராளுமன்ற உறுப்பினர்களாக, அரசியல் கட்சி தலைவர்களாக,
தொழில் அதிபர்களாக பலர் வாழ்வில் உயர்ந்துள்ளனர். அதற்கான வாசல் கதவை இக்கல்லூரி திறந்துவைத்தது. 50 ஆண்டுகளுக்கு முன்பு படித்த மாணவர்கள் கூட இந்த நிகழ்ச்சியில் பங்கேற்றுள்ளனர். அப்போது படித்த ஒரு சிலர் இப்போது நம்மை விட்டு மறைந்து விட்டார்கள். அவர்களது நினைவுகள் எப்பொழுதும் நம்மை விட்டு மறைவதில்லை ,இக்கல்லூரியில் பயின்ற மாணவர்கள் உலகம் முழுவதும் பரவி உள்ளனர் என்றார்.
இவ்விழாவிற்கு முனைவர் முஸ்தபா கமால் தலைமை தாங்க, சங்க பொதுச்செயலாளர் செந்தில் ராஜன் வரவேற்று பேசினார்.
கல்லூரி முதல்வர் முனைவர் விஜயலட்சுமி, முன்னாள் மாணவர்கள் பத்மஸ்ரீ சுப்புராமன், முன்னாள் துணைவேந்தர் ராமசாமி, தொழிலதிபர் நாச்சிக்குறிச்சி சின்னசாமி ஆகியோர் முன்னிலையில், சோம. செந்தமிழ்ச்செல்வன் நிகழ்ச்சியை தொகுத்து வழங்கினார்.
தந்தை பெரியார் கல்லூரியில் இந்த ஆண்டு புதிதாக சேர்ந்த மாணவ, மாணவிகளில் பெற்றோரை இழந்தவர்களுக்கு நலத்திட்ட உதவிகள் வழங்கப்பட்டன.
தமிழக அரசின் டாக்டர் ராதாகிருஷ்ணன் விருது பெற்ற முன்னாள் மாணவர்கள், பழூர் ஆசிரியர் குணசேகரன், மருங்காபுரி ஆசிரியர் ராஜசேகரன், பாடாலூர் தலைமை ஆசிரியை மீனா மாணிக்கம், காமன்வெல்த் பளுதூக்கும் போட்டியில் வெற்றி பெற்ற மாணவர் ஷேக் அப்துல்லா, மகளிர் குத்துச்சண்டை போட்டியில் பல்கலைக்கழக அளவில் முதலிடம் பெற்ற மாணவி பி. யாழினி, என்சிசி துப்பாக்கி சுடும் போட்டியில் வென்ற மாணவர் லெட்சுமணன் ஆகியோரை விழாவில் பாராட்டி கௌரவித்தார்கள்.
தொலைக்காட்சி புகழ் அறந்தாங்கி நிஷா மற்றும் பழனி குழுவினரின் நகைச்சுவை மற்றுறேற் மெல்லிசை நிகழ்ச்சி நடைபெற்றது. முடிவில் முனைவர் செல்லப்பா நன்றி கூறினார்.
முன்னாள் மாணவர்கள் ஆயிரத்துக்கும் மேற்பட்டோர் தங்கள் குடும்பத்தினருடன் விழாவில் பங்கேற்றனர்.