தஞ்சாவூர் மாவட்டம் திருவையாறு ராஜாநகரை சேர்ந்தவர் செந்தில்குமார். இவரது மகன் ஹரிபிரசாத் (16). இவர் தஞ்சையில் உள்ள ஒரு பள்ளியில் பிளஸ்-1 படித்து வந்தார். இதேபோல் திருவையாறு மேலவட்டம் பகுதியை சேர்ந்தவர் ராமலிங்கம் மகன் பிரவீன் (12). இவர் 7-ம் வகுப்பு படித்து வந்தார்.
இந்நிலையில் இன்று மதியம் ஹரிபிரசாத், பிரவீன் மற்றும் அவரது நண்பர்கள் சிலர் சேர்ந்து திருவையாறு 15-ம் மண்டபம் அய்யப்பன்கோவில் படித்துறை காவிரி ஆற்றில் குளித்து கொண்டிருந்தனர். அப்போது தண்ணீரின் வேகம் அதிகரித்துள்ளது. அப்போது ஹரிபிரசாத், பிரவீன் ஆகிய 2 பேரும் தண்ணீரின் வேகத்தில் அடித்து செல்லப்பட்டுள்ளனர். இதை பார்த்த சக நண்பர்கள் அவர்களை காப்பாற்ற முயன்றுள்ளனர். இதற்கிடையில் ஹரிபிரசாத், பிரவீன் ஆகிய இருவரும் ஆழமான பகுதியில் தண்ணீரில் மூழ்கினர். தொடர்ந்து பொதுமக்கள் தீயணைப்புத்துறையினருக்கு தகவல் தெரிவித்தனர். உடன் சம்பவ இடத்திற்கு விரைந்து வந்த தீயணைப்பு வீரர்கள் விரைந்து வந்து ஆற்றில் குதித்து மாணவர்களை தேடினர்.
சற்று தொலைவில் இரு மாணவர்களையும் மயங்கிய நிலையில் இருந்தனர். தீயணைப்பு வீரர்கள் மீட்டு சிகிச்சைக்காக திருவையாறு அரசு மருத்துவமனைக்கு அனுப்பி வைத்தனர். அங்கு இருவரையும் பரிசோதித்த டாக்டர்கள் ஏற்கனவே இறந்து விட்டதாக தெரிவித்தனர்.