வெங்கட்பிரபு இயக்கத்தில் நடிகர் விஜய் , ‘தி கிரேட்டஸ்ட் ஆப் ஆல் டைம்’ (தி கோட்) படத்தில் நடித்துள்ளார். விஜய்யுடன், பிரசாந்த், பிரபுதேவா, யோகிபாபு, சினேகா, லைலா, மீனாட்சி சவுத்ரி உள்பட பலர் நடித்துள்ளனர். ஏ.ஜி.எஸ். நிறுவனம் தயாரித்துள்ள இப்படத்திற்கு யுவன் சங்கர் ராஜா இசையமைத்துள்ளார். டிஏஜிங் தொழில்நுட்பம் மூலம் விஜய் இளம் வயதில் தோன்றும் காட்சிகள் இருப்பதால் இப்படத்தின் மீது பெரியளவில் எதிர்பார்ப்பு எழுந்தது. இந்த படத்தின் டிரைலர் சமீபத்தில் வெளியாகி நல்ல வரவேற்பை பெற்றது.
இந்த நிலையில், பெரும் எதிர்பார்ப்புக்கு மத்தியில் விஜய் நடித்துள்ள ‘தி கோட்’ திரைப்படம் இன்று திரையரங்குகளில் வெளியாகி உள்ளது. தமிழகத்தை தவிர கேரளா, ஆந்திரா, கர்நாடகா உள்ளிட்ட மற்ற நிலங்களில் முதல் காட்சி அதிகாலை 4 மணிக்கு தொடங்கியது. அதிகாலை முதலே ரசிகர்கள் திரையரங்குகளில் கொண்டாட்டத்தில் ஈடுபட்டுள்ளனர். தமிழகத்தில் முதல் காட்சி காலை 9 மணிக்கு தொடங்கியது.
அனைத்து தியேட்டர்கள்களிலும் ரசிகர்கள் பட்டாசு வெடித்து, பாலாபிசேகம் செய்து கொண்டாடடினர். சில இடங்களில் விஜய் ரசிகர்கள் விஜய் கட்அவுட்களுக்கு தேங்காய், பூசணிக்காய்களை உடைத்து திருஷ்டி சுற்றினர்.
விஜய் தவெக கட்சி தொடங்கிய பிறகு தி கோட் படம் தான் முதன் முதலில் வெளியாகிறது என்பதால் விஜய் ரசிகர்கள் அதிக உற்சாகத்தில் உள்ளனர். நேற்று விஜய் மற்றும் கோட் படக்குழுவினர் இந்த படத்தை சென்னையில் பார்த்தனர். கோட் வெற்றியடைய நடிகர் அஜீத் வாழ்த்து தெரிவித்து உள்ளார்.