தஞ்சை மாவட்டம், கும்பகோணம் பழைய பஸ் நிலையம் பகுதியைச் சேர்ந்தவர் ராஜசேகர் மனைவி முத்துலட்சுமி (வயது 55). இவர் நேற்று மதியம் வீட்டில் சமையல் வேலைகளை செய்து கொண்டிருந்தார். அப்போது அவரது வீட்டினுள் திடீரென புகுந்த மர்ம ஆசாமி ஒருவர் வீட்டினுள் எரிந்து கொண்டிருந்த சமையல் கேஸ் அடுப்பின் கேஸ் வரும் குழாயை பிடுங்கி எறிந்துள்ளார். மர்ம நபர் ஒருவர் திடீரென வீட்டினுள் புகுந்து கேஸ் அடுப்பின் குழாயை பிடுங்கியதால் அதிர்ச்சி அடைந்த முத்துலட்சுமி கூச்சலிட்டுள்ளார். மேலும் அந்த மர்ம ஆசாமியிடம் தட்டி கேட்டுள்ளார். இதனால் ஆத்திரமடைந்த அந்த மர்ம ஆசாமி அருகில் கிடந்த விறகு கட்டையால் முத்துலட்சுமியை தாக்கி விட்டு அங்கிருந்து தப்பி ஓடினார். சம்பவத்தை பார்த்துக் கொண்டிருந்த அக்கம் பக்கத்தினர் உடனடியாக அந்த மர்ம அசாமியை விரட்டி சென்றனர். மேலும் வலியால் துடித்துக் கொண்டிருந்த முத்துலட்சுமியை மீட்டு சிகிச்சைக்காக கும்பகோணத்தில் உள்ள ஒரு தனியார் மருத்துவமனையில் சேர்த்தனர். அங்கிருந்து தப்பி உடைய அந்த மர்ம ஆசாமி கும்பகோணம் பழைய பஸ் நிலையம் அருகே உள்ள ஏகாம்பரேஸ்வரர் கோவில் கோபுரத்தில் ஏறி உள்ளே மறைந்து கொண்டார். பின்னால் துரத்தி சென்ற பொதுமக்கள் உடனடியாக இது குறித்து தீயணைப்பு துறையினருக்கும் கும்பகோணம் மேற்கு போலீசாருக்கும் தகவல் தெரிவித்தனர். உடனடியாக சம்பவம் இடத்திற்கு விரைந்து வந்த தீயணைப்பு துறையினர் கோவில் கோபுரத்தில் ஏறி உள்ளே மறைந்திருந்த அந்த மர்ம ஆசாமியை மடக்கி பிடித்து கயிறு மூலம் கட்டி கீழே இறக்கினர். பின்னர் அந்த மர்ம ஆசாமியை கும்பகோண மேற்கு போலீசில் ஒப்படைத்தனர்.
போலீசார் நடத்திய விசாரணையில் அந்த மர்ம நபர் திருத்துறைப்பூண்டி வட சங்கேந்தி பகுதியைச் சேர்ந்த முருகையன் மகன் சிவசங்கர் (35). என்பதும் இவருக்கு திருமணம் ஆகி மனைவி மற்றும் இரண்டு பெண் குழந்தை இருப்பதும் தெரிய வந்தது. மேலும் சற்று மனநலம் பாதித்த நிலையில் இருந்த சிவசங்கரை அவரது சகோதரி சந்திரா மற்றும் உறவினர்கள் சேர்ந்து மேல்மருவத்தூர் கோவிலுக்கு அழைத்து சென்று விட்டு திருத்துறைப்பூண்டிக்கு திரும்பி வரும்போது கும்பகோணம் பஸ் நிலையத்தில் பஸ்ஸிலிருந்து குதித்து ஓடிய போது அவர சகோதரி சந்திரா மற்றும் உறவினர்கள் துரத்தியதால் முத்துலட்சுமி வீட்டில் புகுந்ததும், அப்போது முத்துலட்சுமி சிவசங்கரை தட்டி கேட்டதால் அவரை தாக்கி விட்டு ஓடி சென்று கோவில் கோபுரத்தில் ஏறி ஒளிந்து கொண்டதும் போலீசார் விசாரணைக்கு தெரிய வந்தது. இதனை தொடர்ந்து சிவசங்கரை கும்பகோணம் கிழக்கு போலீசார் போலீஸ் நிலையத்திற்கு அழைத்து சென்று விசாரணை நடத்தி வருகின்றனர். இந்த சம்பவம் கும்பகோணம் பகுதியில் பெரும் பரபரப்பை ஏற்படுத்தியது.