மீன்பிடி தடை காலம் முடிந்து கடந்த 15ம் தேதி தான் தமிழக மீனவர்கள் கடலுக்கு சென்றார்கள். ராமநாதபுரம் மாவட்டத்தில் இருந்து சென்ற மீனவர்கள் நேற்று நெடுந்தீவு அருகே மீன் பிடித்துக் கொண்டு இருந்தனர். அப்போது அங்கு வந்த இலங்கை கடற்படை ராமநாதபுரம் மீனவர்கள் நான்கு பேரை கைது செய்து படகுகளுடன் இலங்கையில் உள்ள கடற்படை முகாமுக்கு கொண்டு சென்றனர். அங்கு அவர்களிடம் விசாரணை நடத்தியது. எல்லை தாண்டி வந்து மீன்பிடித்ததாக கூறி அவர்களை கைது செய்துள்ளதாக இலங்கை கடற்படை அறிவித்தது. அதே நேரத்தில் தமிழக மீனவர்கள் கூறும்போது, இலங்கை கடற்படை வேண்டுமென்றே தமிழக மீனவர்களை குறிவைத்து கைது செய்கிறது. தமிழக மீனவர்களை கைது செய்தால், இந்திய அரசு நடவடிக்கை எடுக்காது என்ற தைரியத்தில் முதல் நாளே இலங்கை தனது அட்டூழியத்தை தொடங்கி விட்டது என தமிழக மீனவர்கள் மனக்குமுறலை கொட்டினர். இந்த சம்பவம் ராமநாதபுரம் மீ்னவர்கள் மத்தியில் கொந்தளிப்பை ஏற்படுத்தியது.