முன்னாள் அமைச்சர் ஆர். எம். வீரப்பன் இன்று காலமானார். அவருக்கு வயது 97. வயது மூப்பு காரணமாக உடல்நலம் பாதிக்கப்பட்டு சென்னை அப்பல்லோ மருத்துவமனையில் அனுமதிக்கப்பட்டு இருந்தார். அங்கு இன்று மதியம் அவர் உயிர் பிரிந்தது. எம்.ஜி.ஆர்., ஜெயலலிதா அமைச்சரவையில் அமைச்சராக இருந்தார் ஆர்எம். வீரப்பன். எம்.ஜி.ஆர் மரணமடைந்ததும், அதிமுக இரண்டாக உடைந்தபோது ஜானகி அணியின் முக்கிய தூணாக இருந்து செயல்பட்டவர் ஆர்.எம். வீரப்பன்.
எம்.ஜி.ஆர் அமைச்சரவையில் இருந்தபோதே இவர் ஜெயலலிதாவுக்கு எதிரான கருத்துக்களை மேடைகளில் பேசிவந்தார். இதனால் ஒரு கட்டத்தில் எம்.ஜிஆர். இவரை பதவியில் இருந்து நீக்கினார்.
எம்.ஜி.ஆரின் தாயார் சத்யா பெயரில் சத்யா மூவீஸ் என சினிமா கம்பெனி நடத்தி வந்த ஆர்.எம். வீரப்பன் எம்.ஜி.ஆர், சிவாஜி, கமல், ரஜினி, உள்ளிட்டவர்களை வைத்து படங்கள் தயாரித்தார். பாட்சா படமும் இவர் தயாரித்தது தான். இவர் எம்.ஜிஆரிடம் கணக்கப்பிள்ளையாக சேர்ந்து பின்னர் மானேஜராக உயர்ந்தார். இவர் புதுக்கோட்டை மாவட்டம் வல்லத்திரைா கோட்டையை சேர்ந்தவர். இவரது மனைவி பெயர் ராஜம்மாள். இவர்களுக்கு 6 குழந்தைகள்.
ஆர். எம். வீரப்பன் மறைவுக்கு தமிழக முதல்வர் மு.க. ஸ்டாலின் மற்றும் அனைத்துக்கட்சி தலைவர்கள் இரங்கல் தெரிவித்துள்ளனர்.