சூர்யா நடிப்பில் அடுத்ததாக திரையரங்குகளில் வெளியாக உள்ள திரைப்படம் ‘கங்குவா’. இதில் திஷா பதானி, பாபி தியோல், யோகி பாபு, ரெடின் கிங்ஸ்லி உட்பட பலர் நடித்துள்ளனர். யுவி கிரியேஷன்ஸ் மற்றும் ஸ்டூடியோ கிரீன் நிறுவனங்கள் இணைந்து தயாரித்துள்ள இந்தப் படத்தை சிறுத்தை சிவா இயக்கி உள்ளார். வெற்றி பழனிச்சாமி ஒளிப்பதிவு செய்துள்ளார்.
தேவிஸ்ரீ பிரசாத் இசையமைப்பில் 3டியில் உருவாகும் இந்தப் படம் தமிழ், தெலுங்கு, இந்தி உட்பட 10 மொழிகளில் வெளியாக இருக்கிறது. இதில் இரண்டு கதாபாத்திரங்களில் சூர்யா நடித்துள்ளதாக கூறப்படுகிறது. இப்படம் வரும் அக்டோபர் 10-ம் தேதி(வியாழன்) திரையரங்குகளில் வெளியாகும் என அதிகாரபூர்வமாக அறிவிக்கப்பட்டுள்ளது.
அத்துடன் நடிகர் ரஜினி நடிப்பில் த.செ.ஞானவேல் இயக்கி வரும் ‘வேட்டையன்’ திரைப்படம், ‘கங்குவா’ வெளியாகும் அதே நாளில் வெளியாக உள்ளது. ஆகவே, ரசிகர்களுக்கு டபுள் ட்ரீட் காத்திருக்கிறது.
அக்டோபர் 11ம் தேதி முதல் 13ம் வரை சரஸ்வதி பூஜை, விஜயதசமி மற்றும் ஞாயிறு என தொடர்ந்து விடுமுறை நாட்கள் வருவதால் இந்த தேதியை தேர்வு செய்யதுள்ளதாக தெரிகிறது. அதே அக்டோபர் மாதம் 31ம் தேதி தீபாவளி பண்டிகை கொண்டாடப்படுகிறது. எனவே தீபாவளிக்கும், ஆயுதபூஜைக்கும் சேர்த்து ரசிகர்களுக்கு விருந்து படைத்துள்ளனர்.