தேனி மாவட்டம் கருவேலநாயக்கன்பட்டி கிராமத்தைச் சேர்ந்தவர் சந்திரன். டாரஸ் லாரி டிரைவர். இவர் அரியலூர் வீ.கைக்காட்டியில் உள்ள அல்ட்ரா சிமெண்ட் ஆலையில் சாம்பலை இறக்கிவிட்டு, டால்மியா சிமெண்ட் ஆலைக்கு சென்றுள்ளார். அதிகாலையில் புதுப்பாளையம் மெயின் ரோட்டில் சென்று கொண்டிருந்தபோது, குடிபோதையில் இருந்த ஓட்டுநரின் கட்டுப்பாட்டை இழந்த டாரஸ் லாரி, நெடுஞ்சாலையின் பக்கவாட்டில் இருந்த வீட்டின் சுவற்றை உடைத்துக்கொண்டு உள்ளே சென்றுள்ளது.
கூலி தொழிலாளியான ரமேஷ் வீட்டுக்குள் லாரி புகுந்ததில், வீட்டிற்குள் உறங்கிக் கொண்டிருந்த ரமேஷின் மனைவி அம்பிகா, அவரது குழந்தைகளான ராஜேஷ், ரம்யா, சுபாஷ் ஆகிய நான்கு பேரும் படுகாயம் அடைந்தனர். அரியலூர் அரசு மருத்துவக் கல்லூரி மருத்துவமனையில் நான்கு பேரும் சிகிச்சைக்காக அனுமதிக்கப்பட்டுள்ளனர். விபத்தில் ரமேஷின் வீடு முற்றிலும் சேதம் அடைந்ததோடு, வீட்டிலிருந்த பிரிட்ஜ் உள்ளிட்ட அத்தியாவசிய பொருட்களும் முற்றிலும் சேதம் அடைந்தது. அரியலூர் போலீசார் சம்பவ இடத்திற்கு சென்று, டாரஸ் லாரி ஓட்டுனர் சந்திரனை கைது செய்து, விபத்து குறித்து விசாரணை நடத்தி வருகின்றனர்.