திருச்சி மாவட்டம் லால்குடி வஉசி நகரை சேர்ந்தவர் ரவிச்சந்திரன். இவரது மகன் நவீன்குமார்(29). இவரது நண்பர் ஆதிகுடி ராஜா. இவர்கள் இருவருக்கும் கடந்த வாரம் தகராறு ஏற்பட்டுள்ளது. அதன் பிறகு இருவரும் பேசிக்கொள்ளவில்லை.
இந்த நிலையில் இவர்களது நட்பு வட்டாரத்தில் உள்ள ஒருவரது குழந்தைக்கு நேற்று பிறந்தநாள் விழா கொண்டாடபட்டது. இதையொட்டி நேற்று இரவு அவர் நண்பர்களுக்கு மது விருந்து நடத்தி உள்ளார். அதில் நவீன்குமார், கலைக்குடில் ராஜா ஆகியோரும் பங்கேற்றனர்.
போதை ஏறிய நிலையில், சிலர் நவீன்குமாரிடம், நீ ஏன் ராஜாவிடம் பேசுவதில்லை என கேட்டுள்ளனர். இதனால் அவர்களுக்கிடையே மீண்டும் தகராறு ஏற்பட்டுள்ளது. இதில் வாக்குவாதம் முற்றியதில் அனைவரும் சேர்ந்து நவீன் குமாரை அரிவாளால் வெட்டியும் கத்தியால் குத்தியும் கொலை செய்தனர். பின்னர் அனைவரும் தப்பி ஓடிவிட்டனர்.
இந்த சம்பவம் குறித்து லால்குடி போலீசார் வழக்குப்பதிவு செய்து ஆதிகுடி ராஜா உள்பட 5 பேரை தேடி வந்தனர். இதில் பாலா, ஸ்ரீநாத் ஆகிய 2 பேரை கைது செய்தனர். மற்றவர்களை தேடி வருகிறார்கள். இந்த சம்பவம் லால்குடி வட்டாரத்தில் பரபரப்பை ஏற்படுத்தி உள்ளது.