பாஜக மாநில தலைவர் அண்ணாமலை, அதிமுக பொதுச்செயலாளர் எடப்பாடி மீது கடுமையான விமர்சனங்களை வைத்தார். தற்குறி என சாடினார். இது அதிமுகவினர் மத்தியில் அதிர்ச்சியை ஏற்படுத்தி உள்ளது.
இதற்கு பதிலடி கொடுக்கும் வயைில், அதிமுக முன்னாள் அமைச்சரும், துணை பொதுச்செயலாளருமான கே.பி.முனுசாமி கண்டனம் தெரிவித்துள்ளார். இது தொடர்பாக செய்தியாளர்களை சந்தித்து பேசிய முனுசாமி கூறியதாவது:
அண்ணாமலை தான்தோன்றிதனமாக பேசி வருகிறார்; அவரை போன்று பரிந்துரையால் கட்சிக்கு வரவில்லை. அண்ணாமலையைப்போல எடப்பாடி பழனிசாமி யாருடைய சிபாரிசின் பேரிலும் பதவிக்கு வரவில்லை. எடப்பாடி பழனிசாமி பற்றி விமர்சிக்க அண்ணாமலைக்கு தார்மீக உரிமையில்லை
2026 சட்டமன்ற தேர்தலிலும் திமுக – அதிமுக இடையேதான் போட்டி. மக்களவை தேர்தலில் ஒரு இடத்திலாவது தமிழ்நாட்டில் பா.ஜ.க. வெற்றி பெற்றதா? அண்ணாமலை மாநில தலைவரான பிறகு பா.ஜ.க. ஏற்கனவே வெற்றிபெற்ற கன்னியாகுமரியிலும் தோல்வியை தழுவியது. மாநில தலைவர் பதவியிலிருந்து மாற்றப்படலாம் என்பதால் தனது பதவியை காப்பாற்றிக் கொள்ள அண்ணாமலை இப்படி பேசுகிறார்.
தலைமை பொறுப்பு தொடர்ந்து இருக்காது என்று அண்ணாமலைக்கு பயம் வந்துவிட்டது. பா.ஜ.க. மாநில தலைவர் பதவியில் இருந்து அண்ணாமலையை விரைவில் அக்கட்சியின் தலைமை அகற்றும்.
இவ்வாறு அவர் கூறினார்.