ஓட்டுக்கு ரூ.2000…. கோவை பாஜக தாராளம்……பட்டுவாடா செய்த பாஜ நிர்வாகி சிக்கினார்

அதேபோல் பல்வேறு இடங்களிலும் பணப்பட்டுவாடா நடைபெறுவதாக வந்த புகார்களின் பேரில் தீவிர கண்காணிப்பிலும் ஈடுபட்டனர். இதன் ஒரு பகுதியாக தொண்டாமுத்தூர் சட்டப்பேரவை தொகுதிக்கு உட்பட்ட பகுதிகளில் பாஜகவினர் வாக்காளர் பட்டியலை வைத்து ஒரு  ஓட்டுக்கு  ரூ.1000 முதல்  ரூ.2 ஆயிரம் வரை  பட்டுவாடாவில் ஈடுபட்டு வருவதாக புகார்கள் வந்தது. இதன் பேரில் தேர்தல் பறக்கும் படை குழுவினர் அவ்வழியாக வந்த சொகுசு கார் ஒன்றை நிறுத்தி சோதனை மேற்கொண்டனர்.

அதில் பாஜக ஆலாந்துறை மண்டல் தலைவரான ஜோதிமணி (37) என்பவர் பயணித்துக் கொண்டிருந்தார். அவர் அரசு போக்குவரத்து கழகத்தில் ஓட்டுநராக பணியாற்றி வருகிறார். அவரது காரில் மேற்கொள்ளப்பட்ட ஆய்வில் 81 ஆயிரம் ரூபாய் பணம் இருந்தது தெரிய வந்தது. மேலும்  ரூ.2 ஆயிரம், 4 ஆயிரம், 6 ஆயிரம் என சிறு சிறு தொகைகளாக பணத்தை பிரித்து வைத்திருந்ததும், அவரது வாகனத்தில் வாக்காளர் பட்டியலையும் வைத்திருந்தது தெரியவந்தது.  ஒரு குடும்பத்தில் எத்தனை வாக்காளர் இருக்கிறார்களோ அதை  அறிந்து ஒரு ஓட்டுக்கு 2 ஆயிரம் வீதம் பணத்தை சிறு சிறு பொட்டலமாக தயாரித்து வைத்திருந்ததும் கண்டுபிடிக்கப்பட்டது. எனவே  தமிழ்நாட்டிலேயே கோவை பாஜக தான் ஓட்டுக்கு 2 ஆயிரம் வீதம் கொடுக்க ஏற்பாடு செய்திருந்தது  கண்டுபிடிக்கப்பட்டுள்ளது. இதையடுத்து பணம், வாக்காளர் பட்டியல் மற்றும் பாஜக துண்டு பிரசுரங்களை பறிமுதல் செய்த தேர்தல் பறக்கும் படை அதிகாரிகள், பணத்தை பேரூர் தாசில்தார் அலுவலகத்தில் ஒப்படைத்தனர். இது சம்பந்தமாக தொண்டாமுத்தூர் போலீஸார் வழக்குப்பதிவு செய்து விசாரணை மேற்கொண்டு வருகின்றனர்.