நெல்லை மாவட்டம், பாபநாசம் மேற்குத்தொடர்ச்சி மலையிலுள்ள பிரதான அணையான உச்ச நீர்மட்டம் 143 அடி கொண்ட காரையார் அணை தென்மாவட்ட மக்களின் விவசாய மற்றும் குடிநீர் தேவையை பூர்த்தி செய்யும் முக்கிய நீர் ஆதாரமாக விளங்குகிறது. இந்த அணையில் கடந்த டிசம்பர் மாதம் பெய்த வரலாறு காணாத கன மழையால் நீர்வரத்து அதிகரித்து நீர்மட்டம் 140 அடிக்கு மேல் உயர்ந்தது.
தற்போது மழை இல்லாததாலும், வெயிலின் தாக்கம் அதிகமாக காணப்படுவதால் அணையின் நீர்மட்டம் தொடர்ந்து சரிந்து வருகிறது. நேற்று காலை நிலவரப்படி அணையின் நீர்மட்டம் 105.15 அடியாகவும், அணைக்கு நீர்வரத்து 58 கன அடியாகவும் உள்ளது.
இந்த நிலையில் காரையார் அணையில் ஏற்கனவே முதலை இருப்பதால் இதுகுறித்த அறிவிப்பு பலகையும் வைக்கப்பட்டுள்ளது. மேலும் அணையின் நீர்மட்டம் குறைவாக இருக்கும் போதும், வெயிலின் தாக்கம் அதிகமாக உள்ள போதும் அவ்வப்போது அணையிலுள்ள முதலைகள் கரைப்பகுதிக்கு வந்து செல்கின்றன. இந்த நிலையில் தற்போது காரையார் அணையின் நீர்மட்டம் பார்க்கக்கூடிய பகுதி அருகே தண்ணீரின் மேற்பரப்பில் முதலை ஒன்று ஓய்வெடுத்தது. இதனை அவ்வழியாக சென்றவர்கள் செல்போனில் வீடியோ எடுத்து கொண்டிருந்தனர். இதை உணர்ந்த முதலை தண்ணீரில் பின்னோக்கி சென்று சிறிது நேரத்தில் மாயமானது. இந்நிலையில் அணையில் முதலை மிதக்கும் அந்த வீடியோ காட்சி தற்போது சமூக வலைத்தளங்களில் வைரலாக பரவி வருகிறது..