திருச்சியில் கடந்த சில நாட்களுக்கு முன்பு அரசுப்பேருந்து ஒன்றின் இருக்கை சேதமடைந்து பயணத்தின் போது கீழே உடைந்து விழுந்தது. பேருந்து சென்று கொண்டிருந்த போது, இருக்கை உடைந்து சாலையில் விழுந்ததில் அதில் அமர்ந்திருந்த நடத்துநரும் கீழே விழுந்து காயமடைந்தார்.
இதே போல் மற்றொரு அரசுப்பேருந்தின் படிக்கட்டுகள் பெயர்ந்து கீழே விழுந்தது. திருப்பனத்தால் அருகே அரசுப்பேருந்து ஒன்று பழுதடைந்து கிளம்பாததால் அதனை சக ஓட்டுநர்களும், நடத்துநர்களும் இணைந்து தள்ளி, கிளப்ப முயற்சித்ததும் பெரும் சர்ச்சையை ஏற்படுத்தியிருந்தது.
இது தொடர்பாக தமிழக போக்குவரத்துத்துறை அமைச்சர் எஸ்.எஸ்.சிவசங்கர், ‘அதிமுக ஆட்சிக்காலத்தில் புதிய பேருந்துகள் வாங்காததே இந்த நிலைக்கு காரணம்’ என குற்றம் சாட்டியிருந்தார். தமிழ்நாடு அரசு சார்பில் விரைவில் புதிய பேருந்துகள் வாங்கப்பட்டு, பழைய பேருந்துகள் பயன்பாட்டில் இருந்து நீக்கப்படும் எனவும் அவர் தெரிவித்திருந்தார்.