தஞ்சை ஜெபமாலைபுரம் குப்பை கிடங்கில் தஞ்சை மாநகராட்சியில் உள்ள 51 வார்டுகளில் சேகரிக்கப்படும் குப்பைகள் கொட்டப்பட்டு தரம் பிரிக்கப்பட்டு வருகிறது. இந்த குப்பை கிடங்கில் ஆண்டுதோறும் கோடை காலம் மற்றும் காற்று காலங்களில் தீ விபத்து ஏற்படுவது வழக்கமாகவே உள்ளது. இதன் காரணமாக தஞ்சை மாநகராட்சிக்குட்பட்ட சீனிவாசபுரம் மேலவீதி மேல அலங்கம் உள்ளிட்ட பல்வேறு பகுதிகளிலும் புகைமூட்டம் காரணமாக பொதுமக்கள் கடுமையாக பாதிக்கப்பட்டு வருகின்றனர்.
பொதுமக்களுக்கு மூச்சுத்திணறல் மற்றும் வாகன ஓட்டிகள் சாலையை கடக்க முடியாத நிலை ஏற்படுவதால் இந்த குப்பை கிடங்கை நகர்ப்பகுதிக்கு வெளியே மாற்ற வேண்டும் என தொடர்ந்து கோரிக்கை வைத்து வருகின்றனர். இதனை மாற்ற நடவடிக்கை எடுக்கப்படும் என மாநகராட்சி சார்பில் அறிவிக்கப்பட்டிருந்தாலும் தற்போது வரை எந்த ஒரு நடவடிக்கையும் எடுக்கப்படவில்லை. இன்று அதிகாலை குப்பை கிடங்கில் ஏற்பட்ட தீயினை மூன்றுக்கும் மேற்பட்ட தீயணைப்பு வாகனங்கள் அனைக்கும் பணியில் ஈடுபட்டு வருகின்றன.
தீ விபத்து காரணமாக அந்த பகுதி முழுவதும் புகை மூட்டமாக காணப்படுவதால் வாகன ஓட்டிகள் கடும் சிரமத்திற்கு உள்ளாகியுள்ளனர் மேலும் வீட்டில் இருப்பவர்களும் சாலையை கடப்பவர்களும் புகையால் கடுமையாக பாதிக்கப்பட்டுள்ளனர். புகைமூட்டம் காரணமாக அந்தப் பகுதியில் வசிக்கும் பொதுமக்களுக்கு மாநகராட்சி சார்பில் முக கவசம் வீடு வீடாக வழங்கப்பட்டது.