திருச்சி திருவெறும்பூர் அருகே உள்ளது காந்தளூர் ஊராட்சி .இங்கு உள்ள கல்லாங்குத்து பகுதியில் சுமார் 25 ஏக்கர் அரசு புறம்போக்கு நிலம் உள்ளது. அதனை அப்பகுதியைச் சேர்ந்த பட்டியல் சமூகத்தினர் கடந்த 60 ஆண்டுகளாக விவசாயம் செய்து வந்தனர்.
அந்த நிலத்தை அரசு இலவச குடிமனை வழங்குவதற்காக எடுக்க உள்ளது என்ற தகவல் அறிந்து கடந்த இரண்டு நாட்களுக்கு முன்பு அப்பகுதியை சேர்ந்த விவசாயிகள் ஆலோசனை செய்தனர் அதில் 60 ஆண்டுகளாக விவசாயம் செய்து வரும் நிலத்தை தங்களுக்கே பட்டா வழங்கி உதவ வேண்டும் என திருச்சி கலெக்டரை சந்தித்து இன்று மனு கொடுப்பது என முடிவு செய்தனர்.
இந்நிலையில் ஆக்கிரமிப்பு நிலத்தை மீட்பதற்காக திருவெறும்பூர் தாசில்தார் ஜெயப்பிரகாசம் தலைமையில் வருவாய்த் துறையினர், காவல் துறையினர் காந்தளூர் கிராமத்திற்கு வந்தனர்.
நிலத்தை ஆக்கிரமித்து விவசாயம் செய்து வரும் விவசாயிகள் மற்றும் விவசாய சங்கத்தினர் மார்க்சிஸ்ட் கம்யூனிஸ்ட் கட்சியினர் காந்தளுர் ஊராட்சி முன்னாள் தலைவர் மாரிமுத்து ஆகியோர் தாசில்தாரிடம் வாக்குவாதம் செய்தனர்.
பின்னர் விவசாயிகள் காந்தளூர் மாதா கோயில் தெரு பின்புறம் உள்ள சாலையை மறித்து வருவாய்த் துறை , காவல்துறை வாகனங்களை செல்ல விடாமல் சாலையில் சுமார் 50 க்கும் மேற்பட்டோர் அமர்ந்து மறியலில் ஈடுபட்டனர்.
பின்னர் விவசாயிகளுக்கும் அதிகாரிகளுக்கும் இடையே அந்த இடத்திலேயே பேச்சு வார்த்தை நடத்தியதில் கலெக்டரை நேரில் சந்தித்து மனு கொடுத்து, இது சம்பந்தமாக அமைதிப் பேச்சு வார்த்தை நடத்திய பின்பும் ஆக்கிரமிப்புகளை அகற்றலாம் என்று முடிவு எடுக்கப்பட்டது. விவசாயிகள் அனைவரும் கலைந்து சென்றனர்.