தஞ்சாவூர் மாவட்டம், தெலுங்கன்குடிகாடு கிராமத்தைச் சேர்ந்தவர் வைத்திலிங்கம். இவர் அ.தி.மு.க., சார்பில் போட்டியிட்டு, ஒரத்தநாடு தொகுதி எம்.எல்.ஏ., ஆனார். 2001 – 2006 வரை, தொழில் மற்றும் வனத்துறை அமைச்சராக இருந்தார். 2011 – 2016 ல் வீட்டு வசதி மற்றும் நகர்ப்புற வளர்ச்சித் துறை அமைச்சராக இருந்தார். பிறகு 2016 – 2021, ஜூன் வரை, ராஜ்யசபா எம்.பி.,யாக பதவி வகித்தார். தற்போது ஒரத்தாடு தொகுதி எம்.எல்.ஏ.,வாக உள்ளார். முன்னாள் முதல்வர் பன்னீர்செல்வத்தின் ஆதரவாளர்.
வீட்டு வசதித்துறை அமைச்சராக வைத்திலிங்கம் இருந்தபோது, சென்னை பெருங்களத்துாரில், ஸ்ரீராம் பிராப்பர்டீஸ் அண்டு இன்ப்ராஸ்ட்ரக்சர் என்ற நிறுவனம், 57.94 ஏக்கரில், 1,453 அடுக்குமாடி குடியிருப்புகள் கட்டவும், ஐ.டி., நிறுவனங்கள் கட்டவும் தீர்மானித்தது. இதற்காக இந்நிறுவனம் அரசு அனுமதி பெறுவதற்காக, அப்போது வீட்டு வசதித்துறை அமைச்சராக இருந்த வைத்திலிங்கத்துக்கு ரூ.27.90 கோடி லஞ்சம் கொடுத்ததாக அறப்போர் இயக்கம் சார்பில் லஞ்ச ஒழிப்பு துறையில் புகார் அளிக்கப்பட்டது.
இதையடுத்து லஞ்ச ஒழிப்பு துறை போலீசார் கடந்த செப்.19ம் தேதி வைத்திலிங்கம், அவரது மகன் பிரபு உள்ளிட்ட 11 பேர் மீது வழக்கு பதிவு செய்து விசாரணை மேற்கொண்டு வருகின்றனர். மேலும், இவ்வழக்கில், வைத்திலிங்கம், தன் குடும்ப உறுப்பினர்கள் பெயரில், அளவுக்கு அதிகமாக சொத்துகள் வாங்கி குவித்து இருப்பதும் தெரிய வந்தது.
வீட்டு வசதி மற்றும் நகர்ப்புற வளர்ச்சி துறை அமைச்சராக இருந்த, 2011 – 2016 காலகட்டத்தில், வைத்திலிங்கம் மற்றும் குடும்ப உறுப்பினர்களின் அசையும், அசையா சொத்துக்கள், வங்கி இருப்பு, வாகனங்கள் வாங்கிய செலவுகள் என, அனைத்தையும் லஞ்ச ஒழிப்பு போலீசார் கணக்கிட்டுள்ளனர்.
இந்நிலையில், வருமானத்திற்கு அதிகமான சொத்து சேர்த்தல், முறைகேடான பண பரிவர்த்தனை போன்ற அடிப்படையில், அமலாக்கத்துறை அதிகாரிகள் இன்று(23 ம் தேதி) காலை சுமார் 7:30 மணிக்கு வைத்திலிங்கத்திற்கு சொந்தமான தெலுங்கன்குடிகாட்டில் உள்ள அவரது வீட்டில் 5 கார்களில், 11 பேர் கொண்ட குழுவினர் திடீரென வந்தனர். அவர்களுடன் மத்திய போலீசாரும் வந்தனர். அப்போது வீட்டில் வைத்திலிங்கம் மற்றும் அவரது குடும்பத்தினர் இருந்தனர்.
திடீரென அமலாக்கத்துறை அதிகாரிகள் வந்ததால் அவர்கள் அதிர்ச்சி அடைந்தனர். அவர்கள் வீட்டில் அனைத்து அறைகளிலும் சோதனை போட்டு வருகிறார்கள். வைத்திலிங்கம் உள்ளிட்ட குடும்ப உறுப்பினர்களிடமும் துருவி துருவி விசாரணை மேற்கொண்டு வருகின்றனர்.
அமலாக்கத்துறை அதிகாரிகள் வந்த சிறிது நேரத்தில் ஒரத்தநாடு போலீசாரும் அங்கு வந்தனர். இதுபற்றிய தகவல் அந்த கிராமம் முழுவதும் பரவியதால் மக்கள் திரண்டனர். ஆனாலும் சோதனை நடந்து வருகிறது.
தஞ்சை அருளானந்த நகரில் வைத்திலிங்கத்தின் மகன் பிரபு வீடு உள்ளது. அங்கு தான் பிரபு, மற்றும் 2வது மகன் டாக்டர் சண்முக பிரபு வசிக்கிறார்கள். இன்று காலை அதிகாரிகள் அங்கு வந்தபோது வீட்டில் மகன்கள் இருவரும் இல்லை. டாக்டர் சென்னை சென்ற உள்ளார். பிரபு தெலுங்கன்குடி காட்டில் இருந்தார். அவரையும் தஞ்சை வரவழைத்து அதிகாரிகள் சோதனை போட்டனர். பிரபுவிடமும் அதிகாரிகள் விசாரணை மேற்கொண்டனர்.
.