மயிலாடுதுறை மாவட்டம் குத்தாலம் தாலுகா திருவாலங்காடு மாதா கோயில் மெயின் ரோடு ஆற்றங்கரை பகுதியில் பாண்டியன் என்பவருக்கு சொந்தமான வெடி தயாரிக்கும் தொழிற்சாலை உள்ளது. 20 ஆண்டுகளுக்கு மேலாக இயங்கி வரும் இந்த தொழிற்சாலையில் இன்று வெடி விபத்து ஏற்பட்டது.
இந்த விபத்தில் வெடி தயாரிக்கும் ப ணியில் ஈடுபட்டிருந்த திருவாவடுதுறையை சேர்ந்த கர்ணன் என்பவர் உடல் சிதைந்து உயிரிழந்தார். மேலும் கலியபெருமாள் ,குமார், லட்சுமணன் ஆகிய மூன்று பேர் படுகாயம் அடைந்து சிகிச்சைக்காக மயிலாடுதுறை அரசு மருத்துவமனைக்கு அனுப்பி வைத்துள்ளனர். இவர்களில் குமார், லட்சுமணன் நிலைமை கவலைக்கிடமாக உள்ளது.
சம்பவ இடத்திற்கு விரைந்து வந்த குத்தாலம் தீயணைப்பு துறையினர் தீயை அணைத்து கட்டுக்குள் கொண்டு வந்தனர். இந்த விபத்து குறித்து போலீசார் விசாரணை செய்து வரும் நிலையில் மயிலாடுதுறை மாவட்ட காவல் கண்காணிப்பாளர் ஸ்டாலின் சம்பவ இடத்தில் நேரடியாக ஆய்வு நடத்தினார். இந்த வெடிக்கிடங்கில் திருமண நிகழ்வு கோயில் விழாக்களுக்கு வெடி மற்றும் நாட்டு வெடிகள் தயாரித்து வழங்கி வருகிறார்கள். இன்று வெடி மருந்து இடிக்கும் போது இந்த விபத்து ஏற்பட்டதாக கூறப்படுகிறது. தொடர்ந்து குத்தாலம் போலீசார் விசாரணை செய்து வருகின்றனர்.