கோவை மருதமலை சுப்ரமணிய சுவாமி கோயில் கும்பாபிஷேகம்….1500 போலீசார் குவிப்பு..

முருகப் பெருமானின் ஏழாம் படை வீடாக கருதப்படும் கோவை மருதமலை அருள்மிகு சுப்பிரமணிய சுவாமி திருக்கோவில் மகா கும்பாபிஷேக திருவிழா நாளை காலை நடைபெற உள்ளது. இதில் ஆயிரக் கணக்கானோர் பங்கேற்பார்கள் என எதிர்பார்க்கப்படுகிறது. இந்த நிலையில் பக்தர்களுக்கான பாதுகாப்பு நடவடிக்கை தீவிர படுத்தப்பட்டு உள்ளது. அதன்படி கோவை மாநகர காவல் துறை மற்றும் மாவட்ட காவல் துறை சார்பில் 1,500 போலீசார் மருதமலையில் குவிக்கப்பட்டு உள்ளனர். இன்று மாலை முதலே மருதமலை திருக்கோவிலுக்கு செல்லும் பாதையில் வாகன போக்குவரத்து முற்றிலும் நிறுத்தப்பட்டு உள்ளது. நாளை காலை கும்பாபிஷேகம் நடைபெறும் நிலையில் கும்பாபிஷேக திருவிழாவில் 750 பேர் மட்டுமே பங்கேற்க அனுமதிக்கப்படுகின்றனர். நாளை முழுவதும் பக்தர்கள் கூட்டம் அதிகரித்து காணப்படும் என்பதால் அடிவாரத்தில் இரு வேறு இடங்களில் 2,000 வாகனங்கள் நிறுத்தும் வகையில் வாகன நிறுத்தம் அமைக்கப்பட்டு உள்ளது. அனைத்து வாகனங்களும் அங்கு நிறுத்தி வைக்கப்பட்டு பக்தர்கள் திருக்கோவில் படிக்கட்டுகள் மூலமாக மட்டுமே கோவிலுக்கு செல்ல அனுமதிக்கப்பட உள்ளனர். அதே போல் முக்கியஸ்தர்களின் வாகனங்கள் நிறுத்துவதற்காக தனியே பார்க்கிங் ஏற்பாடு செய்யப்பட்டு அங்கு இருந்து அவர்களை குளிர்சாதன வசதி பொருத்தப்பட்ட மினி பேருந்துகளில் கோவிலுக்கு அழைத்துச் செல்லவும் ஏற்பாடு செய்யப்பட்டு உள்ளது. இந்த சூழலில் மருதமலை அடிவாரம் மற்றும் கோவில் ஆகிய இடங்களில் பொது மக்களுக்கான பாதுகாப்பு மற்றும் கண்காணிப்பு பணி மேற்கொள்வதற்காக ஏராளமான போலீசார் அங்கு குவிக்கப்பட்டு இன்று மாலை முதலே பாதுகாப்பு பணியில் ஈடுபடுத்தப்பட்டு உள்ளனர். இதனால் மருதமலை திருக்கோவில் வளாகம் முழுவதும் காவல் துறையினரின் கட்டுப்பாட்டுக்குள் கொண்டுவரப்பட்டு உள்ளது குறிப்பிடத்தக்கது.