சென்னை, மாமல்லபுரம் அருகே கடலில் குளித்த ஆந்திரா மாநிலத்தைச் சேர்ந்த கலைக் கல்லூரி மாணவர்கள் 9 பேர் கடலில் மூழ்கினர். இதில் ஒருவர் சடலமாக மீட்கப்பட்டுள்ளார். 4 பேர் மருத்துவமனையில் சிகிச்சை பெற்று வரும் நிலையில், மாயமான 4 பேரை தேடும் பணி நடைபெற்று வருகிறது.
ஆந்திரா மாநிலம், அனந்தப்பூர் பகுதியைச் சேர்ந்த கலைக் கல்லூரி மாணவர்கள் 18 பேர் மாமல்லபுரத்திற்கு சுற்றுலாவிற்காக இன்று வருகை தந்திருந்தனர். இதேபோல் நலகாம்பள்ளியைச் சேர்ந்த கலைக்கல்லூரி மாணவர்கள் 22 பேர் தனி குழுவாக மாமல்லபுரம் சுற்றுலா வந்தனர்.
அங்குள்ள பல்வேறு புராதனச் சின்னங்களையும் அவர்கள் தனித்தனியே பார்வையிட்டனர். இதையடுத்து 40 பேரும் கடற்கரைக்கு வருகை தந்தனர். கடல் சீற்றம் அதிகமாக இருந்த போதும், அதனை பொருட்படுத்தாத மாணவர்கள் 20-க்கும் மேற்பட்டோர் கடலில் இறங்கி குளித்துள்ளனர்.
