தேனி மாவட்டம் சின்னமனூர் அருகே உள்ள அய்யம்பட்டியை சேர்ந்தவர் கருப்பையா. கூலித்தொழிலாளி. அவருடைய மனைவி அவனிகா. இவர்களுக்கு, கடந்த 2 ஆண்டுகளுக்கு முன்பு திருமணம் நடந்தது. குழந்தைகள் இல்லை.
அவனிகாவின் உறவினரான ராம்குமார் என்பவருடன் கருப்பையா கேரளாவுக்கு தினமும் வேலைக்கு சென்று வந்தார். இதனால் கருப்பையா வீட்டுக்கு ராம்குமார் அடிக்கடி சென்றார். அப்போது ராம்குமாருக்கும், அவனிகாவுக்கும் இடையே பழக்கம் ஏற்பட்டு கள்ளக்காதலானது. இந்த விவகாரம் கருப்பையாவுக்கு தெரியவரவே, 2 பேரையும் கருப்பையா கண்டித்தார். ஆனால் அவர்கள் கண்டிப்பை மீறி தொடர்பில் இருந்தனர்.
சம்பவத்தன்று இரவு அவனிகா வீட்டுக்கு ராம்குமார் சென்றார். அவர்கள் 2 பேரும் தனிமையில் இருந்தனர். இதனைக்கண்ட அப்பகுதியை சேர்ந்த ஒருவர் வீட்டின் கதவு தாழ்ப்பாளை வெளிப்பக்கமாக பூட்டி விட்டு கூச்சல் போட்டு ஊரைக்கூட்டினார். இதனால் பயந்து போன அவனிகா கதவை திறக்கும்படி கூறினார். ஆனால் கதவு திறக்கப்படவில்லை.
வெகுநேரமான நிலையில் ஊர் மக்கள் கதவை திறந்து கொண்டு உள்ளே சென்றனர். அப்போது அவனிகா வீட்டுக்குள் சேலையில் தூக்கிட்டு பிணமாக தொங்கி கொண்டிருந்தார். ராம்குமார் மாடிப்பகுதியில் பதுங்கி இருந்தார். அவரைப்பிடித்து ஊர் மக்கள் கவனித்தனர். பின்னர் அவரை சின்னமனூர் போலீசில் ஒப்படைத்தனர். போலீசார் வழக்குப்பதிவு செய்து விசாரணை நடத்தினர்.