நடிகர் விஜய் ‘தமிழக வெற்றிக் கழகம்’ என்ற கட்சியை தொடங்கியுள்ளார். கட்சி தொடங்கிய அறிவிப்பை கடந்த பிப்ரவரி மாதம் 2ம் தேதி விஜய் அதிகாரபூர்வமாக அறிவித்தார்.
கடந்த வருடம் 10 மற்றும் 12-ம் வகுப்பு பொதுத் தேர்வில் தமிழகம் முழுவதும் சட்டமன்ற தொகுதி வாரியாக முதலிடங்களை பெற்ற மாணவ, மாணவிகளுக்கு ஊக்கத் தொகை மற்றும் சான்றிதழ்களை நடிகர் விஜய் வழங்கினார். இந்நிலையில், இந்த வருடமும் பொதுத் தேர்வில் முதல் மூன்று இடங்களை பெற்ற மாணவர்களுக்கு தொகுதி வாரியாக இரண்டு கட்டங்களாக பரிசுகளை வழங்குகிறார்.
முதற்கட்டமாக, இன்று சென்னை திருவான்மியூரில் மாணவர்களுக்கு பாராட்டு விழா நடைபெறுகிறது. அதில், கோவை, ஈரோடு, மதுரை உள்ளிட்ட 21 மாவட்டங்களைச் சேர்ந்த மாணவர்களுக்கு சான்றிதழ்கள் மற்றும் ஊக்கத்தொகையை விஜய் வழங்குகிறார்.
இந்த நிகழ்வில், 750 மாணவர்கள் மற்றும் பெற்றோர்கள் உள்பட 3,500-க்கும் மேற்பட்டோர் கலந்து கொண்டுள்ளனர். அவர்களை விஜய் கட்சியினர் தனி வாகனங்களில் அழைத்து வந்தனர். பாராட்டு விழா நடைபெறும் மண்டபத்துக்கு வந்த மாணவர்கள், பெற்றோரை அவர்களது அடைாள கார்டை பார்த்து உள்ளே அனுப்பினர்.
உள்ளே சென்றதும் மண்டபத்தின் நுழை வாயிலில் புஸ்சி ஆனந்த், அனைவருக்கும் ஒரு பை வழங்கினார். அதில் பிஸ்ட் உள்ளிட்ட ஸ்நாக்ஸ், குடிநீர் பாட்டில் இருந்தது. அதனை பெற்றுக்கொண்ட அனைவரும் வரிசையாக உட்கார வைக்கப்பட்டனர். நடிகர் விஜய் காலையிலேயே வந்துவிட்டார். இங்கு உதவி ஆணையர் தலைமையில் 30 போலீசார் பாதுகாப்பில் ஈடுபட்டுள்ளனர். இன்று மாலை 6 மணி வரை நடைபெறும் இவ்விழாவில் கலந்துகொள்பவர்களுக்கு மதியம் அறுசுவை சைவ விருந்து தயார் வழங்கப்படுகிறது.
இன்னும் 17 மாவட்டத்தை சேர்ந்த மாணவ, மாணவிகளுக்கு வரும் ஜூலை மாதம் 3ம் தேதி விஜய் பரிசுகள் வழங்கி கவுரவிக்கிறார்.