தஞ்சை மாவட்டம், அம்மாபேட்டையில் நாய் கடித்து உயிருக்கு போராடிய குரங்கை வனத்துறையினர் மீட்டு கால்நடை மருத்துவமனைக்கு சிகிச்சைக்காக கொண்டு சென்றனர். தஞ்சாவூர் மாவட்டம், அம்மாபேட்டை தென்றல் நகர் பகுதியில் 4 நாய்கள் சேர்ந்து குரங்கை கடித்து குதறியது. அதில் மயக்கம் அடைந்த குரங்கு ரத்த காயங்களுடன் உயிருக்கு போராடி கொண்டு இருந்தது. இந்நிலையில் அந்த பகுதி வழியாக சென்ற இளைஞர்கள் வனத்துறைக்கு தகவல் தெரிவித்தனர். தஞ்சாவூர் மாவட்ட வன அலுவலர் உத்தரவின் பேரிலும், தஞ்சாவூர் வன சரக அலுவலர் ரஞ்சித் ஆலோசனைப் படி பாபநாசம் பிரிவு வன அலுவலர் ரவி மற்றும் தியாகராஜன் சம்பவ இடத்திற்கு வந்து உயிருக்கு போராடிய குரங்கை மீட்டு ஒரத்தநாடு கால்நடை மருத்துவமனைக்கு சிகிச்சைக்காக எடுத்துச் சென்றனர். மீட்கப்பட்ட குரங்கு கர்ப்பமாக இருந்ததும் குறிப்பிடத்தக்கது.
