சென்னை தலைமை செயலகத்தில் முதலமைச்சர் மு.க.ஸ்டாலின் தலைமையில், தமிழக அமைச்சரவை கூட்டம் நடைபெற்றது. இந்த கூட்டத்தில் அமைச்சர்கள் மற்றும் அரசு துறை செயலாளர்கள் கலந்துகொண்டனர். இந்த கூட்டத்தில் தமிழகத்தின் செயல்படுத்தப்படவுள்ள முக்கிய திட்டங்கள் குறித்து ஆலோசிக்கப்பட்டது. குறிப்பாக மகளிர் உரிமை தொகை திட்டம், முதியோர் உதவி தொகையை 1000 ரூபாயில் இருந்து 1200 ரூபாயாக உயர்த்துவது உள்ளிட்டவை குறித்து ஆலோசிக்கப்பட்டதாக தகவல் வெளியானது.
இந்த நிலையில், அமைச்சரவை கூட்டத்திற்கு பின்னர் நிதி அமைச்சர் தங்கம் தென்னரசு செய்தியாளர்களுக்கு பேட்டி அளித்தார். அப்போது பேசிய அவர், முதியோர் மாத உதவி தொகை ஆயிரம் ரூபாயில் இருந்து 1200 ரூபாயாக உயர்த்த முதலமைச்சர் தலைமையில் நடைபெற்ற அமைச்சரவை கூட்டத்தில் ஒப்புதல் அளிக்கப்பட்டுள்ளதாக கூறினார். முதியோர் உதவி தொகையை உயர்த்தி வழங்குவதன் மூலம் அரசுக்கு கூடுதலாக 845 கோடி ரூபாய் செலவாகும் எனவும், 30 லட்சம் பயனாளிகல் இதன் மூலம் பயனடைவார்கள் எனவும் கூறினார். இனிமேல் ஆதரவற்ற முதியோர், கைம்பெண் மாத உதவித் தொகையை ஆயிரம் ரூபாயில் இருந்து 1200 ரூபாயாக உயர்த்தப்படும் என கூறினார். இதேபோல் மாற்றுத்திறனாளிகள் ஓய்வூதியம் 1000 ரூபாயில் இருந்து 1500 ரூபாயாக உயர்த்தப்பட்டுள்ளதாகவும் கூறினார்.