நாகப்பட்டினம் மாவட்ட ஆட்சியர் அலுவலகத்தின் இன்று வழக்கம் போல் பணிகள் நடைபெற்று வந்தன. இன்று திங்கள் கிழமை என்பதால் மக்கள் குறைதீர்க்கும் நாள் கூட்டம் நடைபெற்ற நிலையில், அதில் கலந்துகொள்வதற்காக மாவட்டத்தின் பல்வேறு பகுதிகளில் இருந்து மக்கள் மாவட்ட ஆட்சியர் அலுவலகத்திற்கு வருகை தந்தனர். இந்த நிலையில், மாவட்ட கலெக்டர் அலுவலகத்தில் உள்ள 3வது தளத்தில் திடீரென தீ விபத்து ஏற்பட்டது. கலெக்டர் அலுவலகத்தின் 3வது தளத்தில் உள்ள அரசு கேபிள் டிவி அலுவலகத்தில் திடீர் தீ விபத்து ஏற்பட்டதால் அங்கிருந்து கரும்புகை கிளம்பியது.
இதனை பார்த்து அதிர்ச்சி அடைந்த அதிகாரிகள் மற்றும் பொதுமக்கள் உடனடியாக வெளியே ஓடி வந்தனர். இதேபோல் மாவட்ட ஆட்சியர் ஜானி டாம் வர்க்கீஸ் பாதுகாப்பாக அங்கிருந்து வெளியேற்றப்பட்டார். தகவல் அறிந்து சம்பவம் இடத்திற்கு வந்த தீயணைப்பு வீரர்கள் உடனடியாக தீயை அணைக்கும் பணியில் ஈடுபட்டனர். மாவட்ட ஆட்சியர் அலுவலகத்தில் திடீர் தீ விபத்து ஏற்பட்ட சம்பவம் பொதுமக்கள் மற்றும் அதிகாரிகள் மத்தியில் பெரும் பரபரப்பை ஏற்படுத்தியது. தீ விபத்துக்கான காரணம் குறித்து போலீசார் விசாரணை நடத்தி வருகின்றனர்.