தமிழ் சினிமாவில் பிரபல நடிகையாக இருப்பவர் நயன்தாரா. தமிழை தவிர இந்தியிலும் பிசியாக நடித்து வருகிறார். கதாநாயகிக்கு முக்கியத்துவம் கொடுக்கும் திரைப்படங்களில் மட்டுமே அவர் நடித்து வந்தார். ஆனால் அது பெரிய அளவில் கைகொடுக்கவில்லை. அதனால் முன்னணி ஹீரோக்களின் திரைப்படங்களில் நடித்து வருகிறார்.
அந்த வகையில் ஷாருக்கான் மற்றும் அட்லி கூட்டணியில் உருவாகி வரும் ‘ஜவான்’ படத்தில் கதாநாயகியாக நடித்துள்ளார். அதேபோன்று ஜெயம் ரவி நடிப்பில் உருவாகும் ‘இறைவன்’ படத்திலும் நடித்து முடித்துள்ளார். இதையடுத்து யூடியூப்பர் ட்யூட் விக்கி இயக்கத்தில் புதிய படம் ஒன்றில் நடிக்கவுள்ளார். இந்த படத்தின் படப்பிடிப்பு பூஜையுடன் விரைவில் தொடங்கவுள்ளது.
இந்நிலையில் யூடியூப்பர் விக்கி படத்திற்கு பிறகு புதிய வெப் தொடர் ஒன்றிலும் நடித்துள்ளார். இந்த வெப் தொடரை லோகேஷ் கனகராஜிடம் உதவி இயக்குனராக பணியாற்றி வரும் விஷ்ணு எடவன் இயக்கவுள்ளார். சமீபத்தில் ‘லியோ’ படத்தில் இருந்து ‘நா ரெடி’ பாடல் வெளியாகி சூப்பர் ஹிட்டடித்தது. இந்த பாடலை எழுதியவர் விஷ்ணு எடவன்தான் என்பது குறிப்பிடத்தக்கது.