2023-2024 ம் கல்வியாண்டில் பெரம்பலூர் மாவட்டத்தில் உள்ள ஆதிதிராவிடர் மற்றும் பழங்குடியினர் நல விடுதிகளில் மாணவ / மாணவிகள் சேருவதற்கு விண்ணப்பங்கள் வரவேற்கப்படுகின்றன. பெரம்பலூர் மாவட்டத்தில் 20 ஆதிதிராவிடர் நல மாணவர் விடுதிகளும், 14 ஆதிதிராவிடர் நல மாணவியர் விடுதிகளும், 1 ஆதிதிராவிடர் நல கல்லூரி மாணவர் விடுதியும், 3 ஆதிதிராவிடர் நல கல்லூரி மாணவியர் விடுதியும், 1 பழங்குடியினர் நல மாணவியர் விடுதியும், 1 பழங்குடியினர் உண்டி உறைவிட உயர்நிலைப் பள்ளி விடுதியும் என ஆக மொத்தம் 40 விடுதிகள் செயல்பட்டு வருகின்றன.
மேற்கண்ட விடுதிகளில் நான்காம் வகுப்பு முதல் கல்லூரி வரை பயிலும் ஆதிதிராவிடர் / பழங்குடியினர் / கிருஸ்துவ மதம் மாறிய ஆதிதிராவிடர் மாணாக்கர் (85%) மிகவும் பிற்படுத்தப்பட்ட வகுப்பின மாணாக்கர் (10%) பிற வகுப்பினர்கள் (5%) என்ற விகிதத்தில் விடுதிகளில் சேர்ப்பதற்கு தேர்வு செய்யப்படுவார்கள்.
கல்லூரிக்கும் வீட்டிற்குமான தொலைவு 5 கிலோமீட்டருக்கு மேல் இருக்க வேண்டும். (மாணவியருக்கும், பெற்றோரை இழந்த மாணவர்கள் மற்றும் தாய் அல்லது தந்தை வெளியூர்களில் பணிபுரிந்து பாதுகாவலர் பொறுப்பில் இருக்கும் மாணவர்களுக்கும் மேற்படி நிபந்தனை பொருந்தாது) பெற்றோர்களின் ஆண்டு வருமானம் ரூ,2,50,000/-இக்கு மிகாமல் இருக்க வேண்டும்.
இவ்விடுதிகளில் தங்கி கல்விப் பயில விரும்பும் அனைத்து மாணவ / மாணவிகளுக்கும் உணவும், உறைவிடமும் இலவசமாக வழங்கப்படும். மேலும், பள்ளி விடுதிகளில் 4 இணைச் சீருடைகளும், 10 ஆம் வகுப்பு மற்றும் 12 ஆம் வகுப்பு மாணவ/மாணவிகளுக்குசிறப்புவழிகாட்டிகையேடுகளும் இலவசமாக வழங்கப்படும்.
மாணவ / மாணவியர்களின் சேர்க்கை 2023-2024 –ஆம் கல்வியாண்டு முதல் விடுதி மேலாண்மை அமைப்பு (Hostel Management System) என்ற செயலியின் மூலம் இணைய வழியில் விதிமுறைகள் மற்றும் வழிகாட்டு நெறிமுறைகளை பின்பற்றி நடைபெற உள்ளதால் மாணவ / மாணவிகள் http://tnadw.hms.in என்ற இணையதளம் மூலம் விண்ணப்பிக்க வேண்டும். இந்த நடைமுறை புதியதாக ஏற்படுத்தப்பட்டுள்ளதால், இணையவழியில் விண்ணப்பிக்க மாணவ / மாணவிகளுக்கு உதவிடுமாறு சம்பந்தப்பட்ட விடுதி காப்பாளர் / காப்பாளினிகளுக்கு அறிவுறுத்தப்பட்டுள்ளது. கல்லூரி மாணவ / மாணவியர் தாங்கள் சேரும் விடுதியில் விண்ணப்பங்களைப் பெற்று சம்மந்தப்பட்ட விடுதி காப்பாளர் / காப்பாளினிகளிடம் 14.06.2023 முதல் 30.06.2023 மாலை 05.00 மணிக்குள் ஒப்படைக்க வேண்டும். மாணவ / மாணவியர் கல்லூரி நிர்வாகத்திடம் விண்ணப்பத்தில் புகைப்படம் ஒட்டி கல்வி நிறுவன சான்றொப்பத்துடன் விண்ணப்பத்தைச் சமர்ப்பிக்க வேண்டும். பெரம்பலூர் மாவட்டத்தில் உள்ள மாணவ / மாணவிகள் இந்த வாய்ப்பினைப் பயன்படுத்திக் கொள்ள வேண்டும் என மாவட்ட ஆட்சித்தலைவர் தெரிவித்துள்ளார்.