மேஷம் – குரு பெயர்ச்சிப் பலன்கள்
லட்சிய கனவுகளுடன் வாழும் மேஷ ராசி அன்பர்களே, இதுவரை உங்கள் ராசிக்கு விரையஸ்தானமான மீனராசியில் அமர்ந்து செலவுகளையும், தேவையற்ற மனஸ்தாபங்களையும் தந்து கொண்டிருந்த குருபகவான் தற்போது உங்கள் ராசியிலேயே ஜன்ம குருவாக அமர இருக்கிறார். 22.4.2023 முதல் 1.5.2024 வரை மேஷ ராசியிலேயே சஞ்சாரம் செய்ய இருக்கும் குருபகவான் இனி எப்படிப்பட்ட பலன்களைத் தர இருக்கிறார் என்பதைப் பார்ப்போம்.
குருபகவான் உங்கள் ராசிக்குப் பிரபல யோகாதிபதி. எனவே ராசியில் குரு சஞ்சரிக்கும் காலகட்டத்தில் நற்பலன்களும் ஏற்படும். அவரே ராசிக்கு விரையஸ்தானாதிபதியாகவும் அமைவதால் நற்பலன்களும் விரைய செலவுகளையும் கலந்தே தருவார்.
ஜன்மகுரு காலகட்டத்தில் உடல் ஆரோக்கியத்தில் கவனம் தேவை. சின்னச் சின்ன உபாதைகளையும் அலட்சியம் செய்யாமல் மருத்துவம் நாட வேண்டிய நேர இது. யோகா, தியானம் மற்றும் உணவு கட்டுப்பாடு மிகவும் அவசியம். எடுத்த காரியங்களை முடிப்பதில் அலட்சியமும், சோர்வுவும் காட்டக்கூடாது. குலதெய்வ வழிபாடு நற்பலன்களை அதிகரிக்கும். வீடு, வாகன பராமரிப்புச் செலவுகள் அதிகரிக்கும்.
என்றாலும் ராசிக்கு 5,7,9 ம் வீடுகளை குருபார்ப்பதால் குடும்பத்தில் சுபநிகழ்ச்சிகள் நடைபெறும். மகன் அல்லது மகளின் திருமண முயற்சிகளில் இருந்த தடைகள் நீங்கும். பழைய வாகனத்தை மாற்றிப் புதிய வாகனம் வாங்குவீர்கள். கணவன் மனைவிக்கிடையே ஒற்றுமை அதிகரிக்கும். வாழ்க்கைத்துணைவழி சொந்தங்களால் ஆதாயமுண்டு. வெகுநாட்களாக வராமலிருந்த பணம் தக்கசமயத்தில் வந்து கை கொடுக்கும். தந்தையின் உடல்நிலை சரியாகும்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 06.02.2024 வரை
இந்தக் காலகட்டங்களில் குருபகவான் அசுவனி நட்சத்திரத்தில் சஞ்சாரம் செய்வதால் அசுவனி நட்சத்திரக்காரர்களுக்கு தேவையற்ற வெறுப்பும் சலிப்பும் ஏற்பட்ட வண்ணம் இருக்கும். பொருளாதார விஷயங்களில் ஒருமுறைக்கு இருமுறை நன்கு யோசித்துச் செயல்படுங்கள். யாரையும் நம்பி ஏமாற வேண்டாம். குடும்பத்தினரோடு கூடுதல் அன்பும் பற்றும் வையுங்கள்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
குருபகவானின் சஞ்சாரம் பரணி நட்சத்திரத்தில் இணைவதால் பரணி நட்சத்திரத்தில் பிறந்தவர்களுக்கு அதிகம் நற்பலன்களை எதிர்பார்க்க முடியாது. மனதளவில் நேர்மறையான விஷயங்களையே நினைக்க வேண்டும். அடிக்கடி மனச்சோர்வு ஏற்பட வாய்ப்புள்ளதால் உற்சாகமாக வைத்துக்கொள்ள வேண்டியது அவசியம்.
17.4.2024 முதல் 1.5.2024 வரை
குருபகவான் கார்த்திகை 1-ம் பாதத்தில் சஞ்சாரம் செய்வதால் அந்த பாதத்தில் பிறந்தவர்களுக்கு அசதி, சோர்வு, மன இறுக்கம், ஏமாற்றம் வந்து போகும்.
குருபகவானின் வக்ர சஞ்சாரம் – 11.9.2023 முதல் 20.12.2023 வரை
குருபகவான் இந்தக் காலகட்டத்தில் அசுவினி மற்றும் பரணி நட்சத்திரங்களில் வக்ர கதியில் சஞ்சாரம் செய்வதால் அனைத்திலும் வெற்றிகிடைக்கும். எதிரிகளின் சூழ்ச்சிகளை வெல்வீர்கள். வெற்றிகள் குவியும். இழுபறியாக இருந்த சொத்துகள் கைக்கு வரும். வீட்டில் வசதிகள் பெருகும்.
வியாபாரிகள் : சந்தை நிலவரம் அறிந்து முதலீடு செய்வது நல்லது. அறிமுகமில்லாத அல்லது அனுபவம் இல்லாத நபர்களின் ஆலோசனையைக் கேட்டுப் பெரிய முதலீடுகள் செய்ய வேண்டாம். ஜூன், பிப்ரவரி மாதங்களில் லாபம் அதிகரிக்கும். ரியல் எஸ்டேட், உணவுக்கூடம், கெமிக்கல், ஏற்றுமதி&இறக்குமதி, கமிஷன் வகைகளால் ஆதாயம் அதிகரிக்கும். பிரச்னைகள் அதிகரித்தாலும் பெரியளவில் பாதிப்புகள் இருக்காது.
உத்தியோகஸ்தர்கள் : மனப்போராட்டங்கள் ஒருபக்கம் இருந்தாலும், மேலதிகாரியின் ஒத்தாசையால் கொஞ்சம் ஆறுதல் கிடைக்கும். மேலதிகாரிகள் மதிப்பார்கள். சவால்களை, பிரச்சனைகளை சமாளிக்க புது தெம்பு பிறக்கும். புது வாய்ப்புகள் வரும்போது அவசரப்படாதீர்கள். கௌரவப் பதவிகள் தேடிவரும். என்றாலும் அதனால் பணிச்சுமையும் அதிகரிக்கும். பதவியுயர்வுக்காக தேர்வு எழுதி வெற்றி பெறுவீர்கள். ஜூன், பிப்ரவரி மாதங்களில் சம்பளத்துடன், சலுகைகளும் கூடும்.
ஆகமொத்தம் இந்த குருப் பெயர்ச்சி வாழ்வின் நெளிவு சுளிவுகளைக் கற்றுக்கொடுத்து முன்னேறும் வழியைக் கொடுக்கும்.
ரிஷபம் – குரு பெயர்ச்சிப் பலன்கள்
என்கடன் பணி செய்து கிடப்பதே என்று இடைவிடாமல் உழைக்கும் ரிஷபராசி அன்பர்களே எல்லோரையும் சமமாக நேசிக்கும் உங்களின் ராசிக்கு 11 ம் வீட்டில் அமர்ந்து பணவரவைத் தந்துகொண்டிருந்த குருபகவான் தற்போது விரைய வீடான 12 ம் வீட்டில் அடியெடுத்துவைக்கிறார். எனவே செலவுகளில் சிக்கனம் தேவை. என்றாலும் எட்டுக்குடையவன் 12 ம் வீட்டில் மறைவது நல்ல பலன்களையே கொடுக்கும். புதிய நண்பர்கள் அறிமுகமாவார்கள். குடும்பத்தில் சிறு சச்சரவுகள் இருந்தாலும் அதைப் பெரிதுபடுத்தாமல் அனைவரையும் அன்பால் அரவணைத்துப்போக வேண்டியது அவசியம். யாரையும் நம்பி எதையும் ஒப்படைக்க வேண்டாம்.
என்றாலும் குரு உங்கள் ராசிக்கு 4, 6, 8 ஆகிய வீடுகளைப் பார்ப்பதால் உடல் ஆரோக்கியம் மேம்படும். வீடுவாங்கும் கனவு நனவாகும். சகோதரர்கள் தங்களின் தவற்றை உணர்ந்து வந்து அன்புபாராட்டுவார்கள். வாகன யோகமும் வாய்க்கும். திரும்பக் கிடைக்காது என்று நினைத்திருந்த பணம் கைக்கு வரும். வழக்குகள் சாதகமாகும். பெரிய பொறுப்புகள் தேடி வரும் ஆன்மிகத்தில் நாட்டம் அதிகரிக்கும். கொஞ்சம் மறைமுக எதிர்ப்புகளும் இருக்கத்தான் செய்யும். என்றாலும் பாதிப்பு எதுவும் இருக்காது,
குருபகவானின் நட்சத்திர சஞ்சாரம்:
23.4.2023 முதல் 23.6.2023 வரை மற்றும் 23.11.2023 வரை
முதல் 6.2.2024 வரை குருபகவான் அசுவனி நட்சத்திரத்தில் சஞ்சாரம் செய்வதால் தேவையான பணம் வரும். ஆன்மிகத்தில் ஈடுபாடு அதிகரிக்கும். சித்தர் பீடங்களுக்குச் சென்று வருவீர்கள். ஆரோக்கியத்திலும் அக்கறை அவசியம்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
உங்கள் ராசிநாதனான சுக்கிர பகவானுக்குரிய பரணி நட்சத்திரத்தில் குருபகவான் சஞ்சாரம் செய்வதால் திடீர் பொருள்வரவுக்கு வாய்ப்புண்டு. மதிப்பு மரியாதை உயரும். புதிய வாகனம் வாங்கும் யோகம் வரும். திருமணம் எதிர்பார்த்துக்காத்திருக்கும் ரிஷப ராசிக்காரர்களுக்குத் திருமணம் கைகூடும்.
17.4.2024 முதல் 1.5.2024 வரை
குருபகவான் கார்த்திகை நட்சத்திரம் 1-ம் பாதத்தில் சஞ்சரிக்கிறார். சூரியனுக்குரிய கார்த்திகையில் குரு சஞ்சாரம் செய்வது ரிஷபத்துக்கு நல்லபலன்களைத் தரும். அரசுக்காரியங்கள் அனுகூலமாகும். நின்றுபோன வீடுகட்டும்பணி அல்லது பழைய வீட்டைப் புதுப்பிக்கும் பணியைத் தொடங்குவீர்கள். என்றாலும் பெற்றோரின் ஆரோக்கியத்தில் கூடுதல் அக்கறை காட்டுவது அவசியம்.
குருபகவான், 11.9.2023 முதல் 20.12.2023 வரையிலான காலகட்டத்தில் அஸ்வினி மற்றும் பரணி நட்சத்திரத்தில் வக்ர கதியில் செல்வதால் தடைப்பட்ட காரியங்கள் சாதகமாக முடியும்.,குடும்பத்தில் இருந்த மன வருத்தங்கள் தீரும். என்றாலும் மனதில் ஒரு சோகம் இருந்தவண்னம் இருக்கும். இறைவழிபாட்டின் மூலம் அது விலகி உற்சாகம் பிறக்கும்.
வியாபாரிகள் : லாபத்தை இரட்டிப்பாகும். புதிய முதலீடுகள் செய்ய வங்கிக்கடன் உதவி கிடைக்கும். நல்ல பணியாளர்கள் அமைவார்கள். கமிஷன், ஏஜென்சி, மருந்து, உர வகைகளால் லாபமடைவீர்கள். ஜூன் முதல் ஆகஸ்டு வரை லாபம் இரட்டிப்பாகும். பிப்ரவரி, மார்ச் மாதங்களில் புது ஒப்பந்தங்கள் கையெழுத்தாகும். கூட்டுத் தொழிலில் கொஞ்சம் விட்டுக்கொடுத்துப் போவது நல்லது.
உத்தியோகஸ்தர்கள் : கடின உழைப்பிற்கு அங்கீகாரம் கிடைக்கவில்லையே என்று அவ்வப்போது வருந்தம் ஏற்பட்டாலும் மூத்த அதிகாரி ஆறுதலாக இருப்பார். அலுவலகச் சூழலில் வீண் விவாதங்களைத் தவிர்ப்பது நல்லது. செப்டம்பர், மார்ச் மாதங்களில் பதவி உயர்வுக்கு வாய்ப்புண்டு. வேலை பளு அதிகரிக்கும். என்றாலும் எதிர்கால நன்மை கருதிப் பணியாற்ற வேண்டியது அவசியம்.
இந்த குருப்பெயர்ச்சி பணவரவையும், செலவினங்களையும் கலந்துத் தரும். படிப்படியான முன்னேற்றத்தைத் தந்து வாழ்வில் நல்ல நிலைக்கு உயர்த்தும்.
மிதுனம் – குரு பெயர்ச்சிப் பலன்கள்
உலகில் அனைத்தையும் உழைப்பால் அடைய வேண்டுமென நினைக்கும் மிதுன ராசி அன்பர்களே உங்கள் ராசிக்கு 10-ம் வீட்டில் அமர்ந்து பலவிதங்களிலும் தொல்லை தந்துவந்த குருபகவான் 22.4.23 அன்று பெயர்ச்சியாகி 1.5.24 வரை உங்கள் ராசிக்கு லாப வீட்டில் அமர்ந்து பலன் தர இருக்கிறார். இனி தொட்டதெல்லாம் வெற்றி கிடைக்கும். மனதில் உற்சாகம் பெருகும். பணவரவும் அதிகரிக்கும். வருமானம் உயரும். ஷேர் மூலம் பணம் வரும். கணவன் மனைவிக்கிடையே அந்நியோன்யம் அதிகரிக்கும். வீட்டில் சுப நிகழ்ச்சிகள் தேடிவரும். உறவினர்களிடையே மதிப்பும் மரியாதையும் அதிகரிக்கும்.
குருபகவான் உங்கள் ராசிக்கு 3, 5, 7 ஆகிய வீடுகளைப் பார்ப்பதால் இளைய சகோதரருடன் இருந்து வந்த மனக்கசப்புகள் நீங்கும். பூர்விக சொத்துகளில் இருந்த பிரச்னைகள் தீரும். பேச்சில் தெளிவு பிறக்கும். எதிர்பார்த்த பணவரவு உண்டாகும். மகன் அல்லது மகளின் திருமணம் சிறப்பாக நடக்கும். குழந்தை பாக்கியம் இல்லையே என்று கவலைப்பட்டுக்கொண்டிருந்த தம்பதியருக்குக் குழந்தை பாக்கியம் உண்டாகும். புது வீடு, வாகனம் வாங்கும் யோகம் வாய்க்கும். தங்க ஆபரணங்கள் வாங்குவீர்கள். கௌரவப் பதவிகள் தேடி வரும். அயல்நாடு சென்று வர விசா கிடைக்கும். அரசாங்க விஷயங்களில் இருந்து வந்த பின்னடைவுகள் நீங்கும்.
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் அசுவனி நட்சத்திரத்தில் சஞ்சந்ரிப்பதால் பணவரவு அதிகரிக்கும். புதிய திட்டங்கள் யாவும் நிறைவேறும். வாழ்வில் அதிரடி மாற்றங்கள் உண்டாகும்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
இந்தக் காலகட்டத்தில் சுக்கிரனின் பரணி நட்சத்திரத்தில் குருபகவான் சஞ்சாரம் செய்வதால் குழந்தை பாக்கியம் உண்டாகும். வழக்கில் வெற்றி உண்டு. வீட்டு உபயோகப் பொருள்கள் வாங்குவீர்கள். ஆடை, ஆபரணச் சேர்க்கை உண்டாகும்.
17.4.2024 முதல் 1.5.2024 வரை
இந்தக் காலகட்டத்தில் குருபகவான் சூரியனின் கார்த்திகை நட்சத்திரம் 1-ம் பாதத்தில் சஞ்சாரம் செய்ய இருப்பதால் தைரியமாக சில முக்கிய முடிவுகளை எடுப்பீர்கள். அதனால் நல்ல பலன்கள் உண்டாகும். செல்வாக்குக் கூடும்.
குருபகவானின் வக்ர சஞ்சாரம் 11.9.2023 முதல் 20.12.2023 வரை
குருபகவான் இந்தக் காலகட்டத்தில் அஸ்வினி மற்றும் பரணி நட்சத்திரங்களில் வக்ர கதியில் சஞ்சாரம் செய்ய இருப்பதால் ஆரோக்கியத்தில் அக்கறை அவசியம். என்றாலும் வெளிவட்டாரத்தில் செல்வாக்குக் கூடும். பணவரவு உண்டு.
வியாபாரிகள் : தொழிலில் இருந்த சுணக்கம் நீங்கும். பணவரவு அதிகரிக்கும். புதிய சலுகைகள் அறிவித்து வியாபாரத்தைப் பெருக்குவீர்கள். புதிய முதலீடுகள் மூலம் கடையை விரிவுபடுத்துவீர்கள். பக்குவமான பணியாளர்கள் கிடைப்பார்கள். ஏப்ரல், மே மாதங்களில் புது ஒப்பந்தங்கள் கையெழுத்தாகும். கெமிக்கல், ஹோட்டல், கமிஷன், இரும்பு வகைகளால் லாபம் உண்டு.
உத்தியோகஸ்தர்கள் : அலுவலகச் சூழலில் இருந்த அவமானங்கள் நீங்கும். உங்கள் மதிப்பு அதிகரிக்கும். பதவி உயர்வு, சம்பள உயர்வு தேடிவரும். இழந்த சலுகைகளை மீண்டும் பெறுவீர்கள். வேலைச்சுமை குறையும். ஜூன், மார்ச், ஏப்ரல் மாதங்களில் முன்னேற்றம் உண்டாகும். மூத்த அதிகாரிகள் பாராட்டுவர். சிலருக்கு வெளிநாட்டு வேலை வாய்ப்பு உண்டாகும்.
மொத்தத்தில் இந்த குருப்பெயர்ச்சி தடைகளை நீக்கி உங்களை சாதனையாளராக மாற்றும்.
கடகம் – குரு பெயர்ச்சிப் பலன்கள்
தளராத மனமும் தயாள குணமும் கொண்ட கடக ராசி அன்பர்களே இதுவரை உங்கள் ராசிக்கு ஒன்பதாம் வீடான மீனத்தில் அமர்ந்து நற்பலன்களை வழங்கிக்கொண்டிருந்த குருபகவான் தற்போது 10 ம் வீடான மேஷத்தில் 22.04.2023 முதல் 01.05.2024 வரை அமர்ந்திருந்து பலன் தர இருக்கிறார். பத்தில் குரு அமர்ந்தால் ஆபத்தே… பதவிக்குச் சிக்கல் வருமே என்று கலங்க வேண்டாம்.
குருவின் சஞ்சார வீடு சாதகமில்லாத நிலையிலும் குருவின் பார்வை தரும் பலன்களால் துன்பங்களிலிருந்து எளிதில் மீள்வீர்கள். உங்கள் ராசிக்கு 2, 4, 6 ஆகிய வீடுகளை குருபகவான் பார்ப்பதால் யாராலும் முடிக்கமுடியாத விஷயங்களைக் கூட உங்கள் சாமர்த்தியத்தால் பேசியே முடித்துவிடுவீர்கள். அந்த அளவிற்கு வாக்குஸ்தானம் வலுப்பெறப் போகிறது. பணம் வரவில் இருந்த சிக்கல்கள் நீங்கி தேவையான பொருள்வரவு உண்டாகும். பழைய சொத்துப் பிரச்னைகளுக்குத் தீர்வு கிடைக்கும். கடன்கள் அடைபட வாய்ப்புண்டு. ஆரோக்கியத்தில் கூடுதல் அக்கறை செலுத்துங்கள். சர்க்கரை, கொழுப்பு அளவைப் பரிசோதித்துக் கொள்ளுங்கள். லாகிரி வஸ்துக்களை முற்றிலும் தவிர்ப்பது நல்லது.
உத்தியோக ஸ்தானமான 10 – ம் வீட்டில் குருபகவான் சஞ்சாரம் செய்வதால் பணிச்சுமை அதிகரித்தவண்ணம் இருக்கும். பணியிடத்தில் தேவையற்ற வீண்பழி, மன உளைச்சல் ஏற்படும். உங்கள் உழைப்புக்கான அங்கீகாரம் இல்லையே என்று வருத்தப்படுவீர்கள். என்றாலும் மேலதிகாரிகளிடம் பேசும்போது நிதானத்தைக் கடைப்பிடிப்பது நல்லது.
பிள்ளைகளின் உயர்கல்வி – திருமண முயற்சிகளில் இழுபறி நிலை காணப்படும் என்றாலும் முயன்று முடித்துவிடுவீர்கள். உடன்பிறந்தவர்கள் அவ்வப்போது தொந்தரவு தருவார்கள். யாரையும் விமர்சித்துப் பேசவேண்டாம். அக்கம் பக்கத்தில் விட்டுக்கொடுத்துப் போவது நல்லது.
குருபகவானின் நட்சத்திர சஞ்சாரம்:
22.04.2023 முதல் 23.06.2023 வரை மற்றும் 23.11.2023 முதல் 06.02.2024 வரை
இந்தக் காலகட்டத்தில் குருபகவான் அசுவனி நட்சத்திரத்தில் சஞ்சாரம் செய்வதால் வரவுக்கு மீறி செலவு செய்ய வேண்டியிருக்கும். ஆனாலும் சமாளித்துவிடுவீர்கள். சிலருக்கு கௌரவப் பதவிகள் தேடி வரும். வேலைகளில் இருந்த இழுபறி நிலை மாறி சாதகமாகும். அரசாங்க வகையில் அனுகூலம் உண்டு.
23.06.2023 முதல் 22.11.2023 வரை மற்றும் 06.02.2024 முதல் 17.04.2024 வரை
இந்தக் காலகட்டத்தில் குருபகவான் சுக்கிரனின் பரணி நட்சத்திரத்தில் சஞ்சாரம் செய்வதால் மூத்த சகோதரர்கள் பலவகையிலும் உதவுவார்கள். திடீர் பணவரவு உண்டு. என்றாலும் வழக்குகளில் அலட்சியம் வேண்டாம். மறைமுக எதிரிகளைக் கண்டறிந்து விலக்குவீர்கள்.
17.04.2024 முதல் 01.05.2024 வரை
குருபகவான் இந்தக் காலகட்டத்தில் கார்த்திகை 1-ம் பாதத்தில் செல்வதால் கைமாற்றாக வாங்கியிருந்த பணத்தை தந்து முடிப்பீர்கள். உறவினர்கள் மத்தியில் செல்வாக்குக் கூடும். இழந்தப் பதவியை மீண்டும் பெறுவீர்கள். போட்டியில் வெற்றி உண்டு.
குருபகவானின் வக்ர சஞ்சாரம் – 11.09.2023 முதல் 20.12.2023 வரை
குருபகவான் இந்தக் காலகட்டத்தில் அசுவினி மற்றும் பரணி நட்சத்திரங்களில் வக்ர கதியில் சஞ்சாரம் செய்வதால் வீண் அலைச்சல் உண்டாகும். வாகனப் பராமரிப்பு செலவுகள் அதிகரிக்கும். வீட்டிலும் சின்னச் சின்ன ரிப்பேர் ஏற்பட்ட வண்ணம் இருக்கும்.
வியாபாரிகள் : போட்டிகள் கடுமையாக இருந்தாலும் அவற்றை சமாளிப்பீர்கள். விளம்பரம் மூலம் தொழிலை விருத்தி செய்வீர்கள். சந்தை நிலவரம் அறிந்து முதலீடு செய்வது நல்லது. பழைய பாக்கிகளை சாமர்த்தியமாக வசூலிக்கப்பாருங்கள். பணியாளர்களிடம் விட்டுக்கொடுத்துப் போவது நல்லது. கெடுபிடிகாட்ட வேண்டாம். கமிஷன், கெமிக்கல், எலக்ட்ரானிக்ஸ் மற்றும் துணி வகைகளால் லாபமடைவீர்கள். ஜூன், செப்டம்பர் மாதங்களில் புது ஒப்பந்தங்கள் கையெழுத்தாகும். லாபம் அதிகரிக்கும்.
உத்தியோகஸ்தர்கள் : பதவி உயரும் காலம் இது. இருந்தாலும் பணியிடங்களில் சின்னச் சின்ன அவமானங்களையும் பிரச்னைகளையும் சந்திக்க வேண்டியிருக்கும். மற்றவர்களின் பணிகளையும் சேர்த்து பார்க்க வேண்டி வரும். அலுவலக ரகசியங்களை வெளியே பகிர்ந்துகொள்ள வேண்டாம். மேலதிகாரிகள் கண்டிப்பு காட்டுவார்கள். அடிக்கடி விடுமுறை எடுப்பதைத் தவிருங்கள். புதுவாய்ப்புகள் வந்தால் நன்கு ஆலோசித்து ஏற்றுக்கொள்வது நல்லது. செப்டம்பர், அக்டோபர், ஜனவரி மாதங்களில் உயர்வு உண்டு. வெளிநாட்டுத்தொடர்புடைய நிறுவனங்களிலிருந்தும் புதிய வாய்ப்புகள் வரும்.
மொத்தத்தில் இந்த குருப்பெயர்ச்சி கொஞ்சம் ஏமாற்றங்களையும், இழப்புகளையும் தந்தாலும் பல விஷயங்களில் சாதிக்கவும் வைக்கும்.
சிம்மம் – குரு பெயர்ச்சிப் பலன்கள்
நேர்மையான உழைப்பால் எதையும் சாதிக்கவேண்டும் என்னும் நல்லெண்ணம் கொண்ட சிம்ம ராசி அன்பர்களே, இதுவரை உங்கள் ராசிக்கு எட்டாம் வீட்டில் அமர்ந்து மனப்போராட்டத்தையும், பணப்போராட்டத்தையும் கொடுத்து வந்த குருபகவான் இப்போது 22.4.2023 முதல் 1.5.2024 வரை உங்கள் ராசிக்கு பாக்கிய வீடான 9-ம் வீட்டில் சஞ்சரிக்க இருக்கிறார்.
‘ஓடிப்போனவனுக்கு ஒன்பதாம் வீட்டில் குரு’ என்பது பழமொழி. அதற்குகேற்ப இனி எதைத் தொட்டாலும் வெற்றியில் போய் முடியும். குடும்பத்திலிருந்த வீண் விவாதங்கள், சண்டை சச்சரவுகள் அனைத்தும் விலகும். கணவன் – மனைவிக்குள் அந்நியோன்யம் அதிகரிக்கும். சுபநிகழ்ச்சிகளால் வீடு களைகட்டும். வருமானத்தில் கொஞ்சத்தைச் சேர்த்து வைக்க முடியும். எங்குச் சென்றாலும் முதல் மரியாதைக் கிடைக்கும். பணவரவு சரளமாக இருக்கும். வீடு, மனை வாங்கும் ஆசை நிறைவேறும்.
குருபகவான் உங்கள் ராசியையே பார்ப்பதால் மனதில் தன்னம்பிக்கை அதிகரிக்கும். தைரியமாக முக்கிய முடிவுகளை எடுப்பீர்கள். மகனுக்கு நல்ல நிறுவனத்தில் வேலை கிடைக்கும். செயல்கள் அனைத்தும் முதல் முயற்சியிலேயே வெற்றியாகும். 3,5 ஆகிய வீடுகளையும் குருபகவான் பார்ப்பதால் இளைய சகோதர, சகோதரிகளுடன் இருந்த கோபதாபங்கெல்லாம் விலகும். அடிப்படை வசதிகள் சேரும். விலையுயர்ந்த ஆபரணங்கள் வாங்குவீர்கள். வசதியான வீட்டில் குடி புகுவீர்கள். ஆன்மீகவாதிகள், சித்தர்களின் சந்திப்பு வாய்க்கும். மகனுக்கு எதிர்பார்த்தபடி அயல் நாட்டில் படிப்பு, வேலை கிடைக்கும். மகளின் கல்யாணத்தை விமர்சையாக நடந்துவீர்கள். பழைய சொந்தம்-பந்தங்கள் தேடி வந்து உறவுபாராட்டுவார்கள்.
குருபகவானின் நட்சத்திர சஞ்சாரம்:
23.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
இந்தக் காலகட்டத்தில் குருபகவான் அசுவனி நட்சத்திரத்தில் சஞ்சரிப்பதால் மகம் நட்சத்திரக்காரர்களுக்கு வேலைச்சுமை அதிகரிக்கும். அவ்வப்போது சின்னச் சின்ன உடல் உபாதைகள் வந்து செல்லும். பணவரவு நிச்சயம் உண்டு. செல்வாக்குக் கூடும். வழக்கில் சாதகமான தீர்ப்பு கிடைக்கும்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
இந்தக் காலகட்டத்தில் குருபகவான் பரணி நட்சத்திரத்தில் சஞ்சாரம் செய்வதால் மகம் நட்சத்திரத்திரக்காரர்களுக்கு திடீர் பணவரவு உண்டு. எதிரிகளை வீழ்த்துவீர்கள், கடன் பிரச்னை தீரும். ஆனால் பூரம் நட்சத்திரக்காரர்களுக்கு தேவையற்ற அலைச்சலும், சிறுசிறு தடைகளும் வந்து நீங்கும். என்றாலும் முன்னேற்றம் நிச்சயம்.
17.04.2024 முதல் 01.05.2024 வரை
இந்தக் காலகட்டத்தில் குருபகவான் உங்கள் ராசிநாதனான சூரியனின் நட்சத்திரமான கார்த்திகை 1-ம் பாதத்தில் சஞ்சாரம் செய்வதால் நிர்வாகத் திறமை பளிச்சிடும். அரசால் ஆதாயம் உண்டு. புதிய வேலை கிடைக்கும்.
குருபகவானின் வக்ர சஞ்சாரம் – 11.09.2023 முதல் 20.12.2023 வரை
இந்தக் காலகட்டத்தில் குருபகவான் அசுவினி மற்றும் பரணி நட்சத்திரங்களில் வக்ர கதியில் செல்வதால் தள்ளிப் போன காரியங்களை விரைந்து முடிப்பீர்கள். பணவரவுக்கு வாய்ப்புண்டு. செல்வாக்கு அதிகரிக்கும். சுபநிகழ்ச்சிகள் கூடிவரும்.
வியாபாரிகள் : தொழிலில் இருந்த சுணக்கம் மாறி புத்துணர்ச்சி பிறக்கும். பெரிய முதலீடுகள் செய்து தொழிலை சீர் செய்வீர்கள். போட்டியாளர்கள் உங்களைக் கண்டு விலகிப்போவார்கள். பாக்கிகளைக் கனிவாகப் பேசி வசூலிப்பீர்கள். அனுபவமிகுந்த வேலையாட்களைப் பணியில் அமர்த்துவீர்கள். கடையை நவீனமயமாக்குவீர்கள். பழைய சரக்குகள் விற்றுத்தீரும். எலக்ட்ரிக்கல்ஸ், டிராவல்ஸ், கட்டட உதிரி பாகங்களால் ஆதாயம் உண்டு.
உத்தியோகஸ்தர்கள் : திறமைக்கு உரிய அங்கீகாரம் கிடைக்கும். இழந்த சலுகைகளை மீண்டும் பெறுவீர்கள். மேலதிகாரி நட்புபாராட்டுவார். அலுவலகத்தில் மதிப்பும் மரியாதையும் அதிகரிக்கும். சக ஊழியர்களிடம் இருந்த மனக்கசப்புகள் நீங்கும். சிலருக்கு வேறு நல்ல புது வாய்ப்புகளும் தேடி வரும்.
மொத்தத்தில் இந்த குருப் பெயர்ச்சி ஒடுங்கியிருந்த உங்களை ஓங்கி வளர வைப்பதுடன் எங்கும் எதிலும் வெற்றியையும், எதிர்பாராத வளர்ச்சியையும் தரும்.
கன்னி- குரு பெயர்ச்சிப் பலன்கள்
எல்லோரும் நல்லவராக இருந்து முடிந்தவரை அனைவருக்கும் உதவும் கன்னிராசி அன்பர்களே இதுவரை உங்கள் ராசியை நேருக்குநேர் பார்த்துக் கொண்டிருந்த குருபகவான் இப்போது 22.4.2023 முதல் 1.5.2024 வரை உங்கள் ராசிக்கு அஷ்டம ஸ்தானமான மேஷத்தில் சென்று மறைய இருக்கிறார். அஷ்டம குரு செயல்களில் தடுமாற்றத்தைத் தருவாரோ என்று கவலைப் பட வேண்டாம். உபய ராசியான கன்னியா ராசிக்கு குருபகவான் பாதகாதிபதி. அப்படிபட்டவர் 8 -ல் மறைவது கெடுபலன்கள் குறைந்து நற்பலன்களையே கொடுக்கும்.
இனி கணவன் மனைவிக்குள் இருந்த வருத்தங்கள் நீங்கும். அந்நியோன்யம் அதிகரிக்கும். வேலைகள் தாமதமாக முடியும். செலவுகளும் அதிகரிக்கும். மற்றவர்களை நம்பி முக்கியப் பொறுப்புகளை ஒப்படைக்க வேண்டாம்.
குருபகவான் ராசிக்கு 2, 4, 12 ம் வீடுகளைப்பார்ப்பதால் குடும்பத்தில் நிலவி வந்த கூச்சல் குழப்பங்களெல்லாம் முடிவுக்கு வரும். மகிழ்ச்சி தங்கும். வீண் சந்தேகம் தீரும். மனைவிவழி உறவினர்களால் ஆதாயமுண்டு. ஆடை ஆபரணங்கள் சேரும். கேட்ட இடத்தில் உதவிகள் கிடைக்கும். இதுவரை இருந்துவந்த உடல் சோர்வு, அசதி, வீண்அலைச்சல், டென்ஷன் நீங்கும். பிதுர்வழி சொத்துகள் கிடைக்கும். புண்ணியத் தலங்களுக்குச் சென்றுவருவீர்கள். வழக்குகள் சாதகமாகும். வாகனம் வாங்கும் யோகம் உண்டு.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் இந்தக் காலகட்டத்தில் அசுவனி நட்சத்திரத்தில் செல்வதால் அலைச்சல் இருந்தாலும் முன்னேற்றமும் உண்டு. சிறுசிறு விபத்துகள், பொருள் இழப்புகள் வந்து நீங்கும். ஆனால் பணவரவு குறையாது. புகழ், கௌரவம் கூடும். அரசால் ஆதாயம் உண்டு. முக்கிய பதவிகள், பொறுப்புகள் தேடி வரும்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
இந்தக் காலகட்டத்தில் உங்கள் ராசிக்கு தனபாக்யாதிபதியான சுக்கிரனின் பரணி நட்சத்திரத்தில் குருபகவான் சஞ்சாரம் செய்வதால் திடீர் வெற்றி, வாகனயோகம், ஆடை, ஆபரணச் சேர்க்கை உண்டாகும்.
17.4.2024 முதல் 1.5.2024 வரை குருபகவான் சூரியனின் கார்த்திகை நட்சத்திரம் 1-ம் பாதத்தில் செல்வதால் அரசு விஷயங்களில் கவனம் தேவை. தந்தையாருக்கு மருத்துவச் செலவுகள் உண்டு.
குருபகவானின் வக்ர சஞ்சாரம் – 11.9.2023 முதல் 20.12.2023 வரை
குருபகவான் அசுவினி மற்றும் பரணி நட்சத்திரங்களில் வக்ர கதியில் சஞ்சாரம் செய்யும் இந்தக் காலகட்டத்தில் கொஞ்சம் வளைந்துக் கொடுத்துப் போவது நல்லது. அவ்வப்போது ஒரு வெறுமையை உணருவீர்கள். கணவன் – மனைவிக்குள் தேவையற்ற சச்சரவுகள் வந்து நீங்கும்.
வியாபாரிகள் : தேவையான பண உதவி கிடைக்கும். தொழிலில் ஆர்வம் பிறக்கும். கடையை வேறிடத்திற்கு மாற்ற வேண்டிய சூழல் வாய்க்கும். பழைய பாக்கிகளைக் கறாராகப் பேசி வசூலிப்பது நல்லது. பங்குதாரர்களிடம் மனம் விட்டுப் பேசுங்கள். ஜூலை, ஆகஸ்டு மாதங்களில் புது ஒப்பந்தங்கள் கையெழுத்தாகும்.
உத்தியோகஸ்தர்கள் : மேலதிகாரி இனி உங்கள் திறமையை அங்கீகரிப்பர். எதிர்பார்த்த பதவியுயர்வு தேடி வரும். அதிகாரிகளின் அந்தரங்க விஷயங்களைப் பற்றிப் பேச வேண்டாம். டிசம்பர், ஜனவரி மாதங்களில் புது வாய்ப்புகள் அமையும். திறமைக்கேற்றபடி பாராட்டு, பதவியுயர்வு கிடைக்கும்.
மொத்தத்தில் இந்த குருப்பெயர்ச்சி செலவுகளை அதிகமாக்கினாலும், சொத்து சேர்க்கையையும், அலைச்சலையும் அதே நேரம் ஆதாயத்தையும் தரும்.
துலாம் – குரு பெயர்ச்சிப் பலன்கள்
சமயோஜித புத்தியும் சாமர்த்திய குணமும் கொண்ட துலாம் ராசி அன்பர்களே… இதுவரை உங்கள் ராசிக்கு 6 -ம் வீடான மீனத்தில் ஆட்சி பெற்று அமர்ந்து உங்களை வாட்டி எடுத்த குருபகவான் இப்போது 7-ம் இடமான மேஷ ராசியில் வந்து அமர்கிறார். 22.4.2023 முதல் 1.5.2024 வரை ஏழாம் வீட்டில் நின்று பலன் கொடுக்க இருக்கிறார். ஏழில் குரு சஞ்சாரம் செய்தால் மனதில் தெளிவு பிறக்கும். அடங்கிக்கிடந்த ஆற்றல்கள் வெளிப்படும். ஏழாம் வீட்டில் அமர்ந்து நேர் பார்வையாக உங்கள் ராசியைப் பார்க்கிறார். குடும்பத்தில் இருந்த குழப்பங்கள் நீங்கி அமைதி பிறக்கும். தேவைக்கும் அதிகமாகப் பணவரவு இருக்கும். உறவினர்கள், நண்பர்கள் மத்தியில் பெருமை புகழ் அதிகரிக்கும். மகனுக்கு வேலை மகளுக்கு திருமண ஏற்பாடு ஆகியன நல்லபடி அமையும்.
குருபகவான் உங்கள் ராசிக்கு 3 ம் வீட்டையும் 11 ம் வீட்டையும் பார்ப்பதால் வெளிவட்டாரத்தில் மதிப்பு மரியாதை அதிகரிக்கும். இளைய சகோதர, சகோதரிகள் தங்கள் தவற்றை உணர்ந்து சமாதானம் ஆவார்கள். அரசாங்க அதிகாரிகளின் நட்பு கிடைக்கும். வி.ஐ.பிகள் தக்க நேரத்தில் உங்களுக்கு உதவுவார்கள். வழக்குகள் சாதகமாக முடியும். கெட்ட பழங்களிலிருந்தும் கெட்ட சகவாசங்களில் இருந்தும் முற்றிலும் விடுபடுவீர்கள். விலையுயர்ந்த தங்க ஆபரணம் வாங்குவீர்கள்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் இந்தக் காலகட்டத்தில் அசுவனி நட்சத்திரத்தில் சஞ்சாரம் செய்வதால் வேலைகள் இழுபறியின்றி முடியும். எதிர்பார்த்த பணம் கைக்கு வரும். போட்டி பந்தயங்களில் வெற்றிகள் குவியும். திடீர் பயணங்கள் அதிகரிக்கும். என்றாலும் செலவுகளும் அதிகரிக்கும் என்பதால் சிக்கனம் தேவை. யாருக்கும் ஜாமின் கையெழுத்துப் போடவேண்டாம்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
இந்தக் காலகட்டத்தில் குருபகவான் சுக்கிரனின் பரணி நட்சத்திரத்தில் சஞ்சாரம் செய்வதால் முயற்சிகளில் வெற்றி, எதிர்பாராத பணவரவு ஆகியன கிடைக்கும். விலை உயர்ந்த ஆபரணங்கள் வாங்குவீர்கள். மகளுக்கு சுபநிகழ்ச்சிகள் கூடிவரும்.
17.4.2024 முதல் 1.5.2024 வரை
குருபகவான் கார்த்திகை 1-ம் பாதத்தில் சஞ்சரிக்கும் இந்தக் காலக்கட்டங்களில் யாருக்கும் இரவல் தருவதை நிறுத்துங்கள். அரசுக்கு செலுத்த வேண்டிய வரிகளை உரிய நேரத்தில் செலுத்தப்பாருங்கள்.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
குருபகவான் அசுவினி மற்றும் பரணி நட்சத்திரங்களில் வக்ர கதியில் சஞ்சாரம் செய்யும் இந்தக் காலகட்டத்தில் தெளிவாக சிந்திப்பீர்கள். ஆரோக்கியத்தில் இருந்த பின்னடைவுகள் நீங்கும். கணவன் – மனைவிக்குள் இருந்து வந்த மோதல்கள் விலகும். நேர்மறை எண்ணங்கள் தோன்றும். என்றாலும் சட்டத்திற்கு புறம்பான வகையில் யாருக்கும் உதவ வேண்டாம்.
வியாபாரிகள் : போட்டிகளால் முடங்கிப்போன வியாபாரத்தை மறுபடி தூக்கி நிறுத்துவீர்கள். உங்களின் தொழிலில் அணுகுமுறையை மாற்றுவீர்கள். புதிய முயற்சிகள் பலன் கொடுக்கும். அனுபவமிகுந்த நல்ல வேலையாட்கள் கிடைப்பார்கள். கடையை அழகுபடுத்துவீர்கள். புது சலுகைகளை அறிமுகப்படுத்தி விற்பனையைப் பெருக்குவீர்கள். செப்டம்பர், அக்டோபர், ஜனவரி, மார்ச் மாதங்களில் வங்கிக் கடனுதவி கிடைக்கும். ரியல் எஸ்டேட், உணவு விடுதி, வாகன உதிரி பாகங்களால் லாபமடைவீர்கள்.
உத்தியோகஸ்தர்கள் : அலுவலக சூழலில் இருந்த பிரச்னைகள் தீரும். சக ஊழியர்கள் உஙளை மதிப்பார்கள். செப்டம்பர், ஜனவரி, மார்ச் மாதத்தில் எதிர்பார்த்த பதவி உயர்வு, சம்பள உயர்வு கிடைக்கும். சிலருக்கு வெளிநாட்டிலிருந்து நல்ல வேலை வாய்ப்பு கிடைக்கும்.
மொத்தத்தில் இந்த குருப்பெயர்ச்சி உங்களை வெற்றி பெற வைப்பதுடன், வருங்காலத் திட்டங்களையும் நிறைவேற்றுவதாக அமையும்.
விருச்சிகம் – குரு பெயர்ச்சிப் பலன்கள்
கலகலப்பான குணமும் கலங்காத மனமும் கொண்ட விருச்சிக ராசி அன்பர்களே… இதுவரை உங்கள் ராசிக்கு பூர்வ புண்ணிய ஸ்தானமான மீனத்தில் அமர்ந்து நற்பலன்களை வழங்கிக்கொண்டிருந்த குருபகவான் தற்போது ஆறாம் இடமான மேஷராசியில் சஞ்சாரம் செய்ய இருக்கிறார். 22.4.2023 முதல் 1.5.2024 வரை ஆறாவது வீட்டில் குருபகவான் அமர்ந்து பலன் தரப்போகிறார். ஆறில் குரு அமர்வது சிற்சில தடைகளை ஏற்படுத்ததான் செய்யும். எதையும் போராடி சாதிக்க வேண்டியிருக்கும். குடும்பத்தில் சின்னச் சின்ன சண்டைகள் குழப்பங்கள் வந்த வண்ணம் இருக்கும் விட்டுக்கொடுத்துப் போகும் குணமும் பொறுமையும் அவசியம். யாரையும் நம்பி உங்கள் ரகசியங்களைச் சொல்ல வேண்டாம். யாருக்கும் ஆபரணங்களை இரவல் தர வேண்டாம். செலவுகள் அதிகரிக்கும். கையிருப்பு கரைவதால் பதற்றமாவீர்கள்.
என்றாலும் குருபார்வை உங்கள் ராசிக்கு 2,12,10 ஆகிய ஸ்தானங்களுக்குக் கிடைப்பதால் மலைபோல் வரும் பிரச்னையும் பனிபோல் விலகும். பேச்சில் பக்குவம் பிறக்கும். செலவுக்கு ஏற்பப் பணமும் வந்து சேரும். கொடுத்துத் திருப்பி வராமல் இருந்த கடன் தொகை கைக்கு வரும். வழக்குகளில் வெற்றி கிடைக்கும். குடும்பத்திற்குள் மகிழ்ச்சியான நிகழ்ச்சிகள் நடைபெறும். இதுவரை வேலை இல்லாதவர்களுக்கு நல்ல நிறுவனத்தில் வேலை கிடைக்கும்.மதிப்பு மரியாதை கூடும்.
சுபச்செலவுகள் அதிகரிக்கும். வெளியூர் பயணங்கள் மேற்கொள்ள வேண்டிவரும். அதனால் ஆதாயம் உண்டு. சிலருக்கு வீடு வாங்கும் கனவு நனவாகும். என்றாலும் புது சொத்துக்கள் வாங்கும்போது பத்திரங்களை வழக்கறிஞர்கள் மூலம் சரிபார்த்துக் கொள்வது நல்லது.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் அசுவனி நட்சத்திரத்தில் சஞ்சாரம் செய்யும் இந்தக் காலகட்டத்தில் செலவுகளும் அலைச்சலும் அதிகரிக்கும். விசாகம் 4 -ம் பாதம், கேட்டை நட்சத்திரக்காரர்களுக்கு பணப்புழக்கம் அதிகரிக்கும். தடைப்பட்ட காரியங்களை முடிக்கும் துணிச்சல் பிறக்கும்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
குருபகவான் இந்தக் காலகட்டத்தில் பரணி நட்சத்திரத்தில் சஞ்சாரம் செய்வதால் திருமண வரம் கைகூடும். கடன்களை அடைக்கும் அளவுக்குப் பணம் வரும். புதிய வாகன யோகம் வாய்க்கும். வாழ்க்கைத்துணையின் ஆரோக்கியத்தில் அக்கறை செலுத்துவது நல்லது.
17.4.2024 முதல் 1.5.2024 வரை
குருபகவான் உங்கள் ஜீவனாதிபதியான சூரியனின் நட்சத்திரமான கார்த்திகை 1-ம் பாதத்தில் சஞ்சரிக்கும் இந்தக் காலகட்டத்தில் எதிர்பாராத பணவரவு, செல்வாக்கு உண்டாகும்.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
குருபகவான் இந்தக் காலகட்டத்தில் வக்ர கதியில் அசுவினி மற்றும் பரணி நட்சத்திரங்களில் சஞ்சாரம் செய்ய இருப்பதால் புத்திக்கூர்மை அதிகமாகும். வாழ்க்கைத்துணைக்குப் புதிய வேலை கிடைக்கும். பொன், பொருள் சேர்க்கை உண்டாகும். சிலருக்கு வீடு வாகன யோகம் அமையும்.
வியாபாரிகள் : தொழிலில் போட்டிகள் அதிகரிக்கும். எனவே பதற்றம் இன்றிச் செயல்பட வேண்டியது அவசியம். புதிய முடிவுகளையோ அதிரடி மாற்றங்களையோ இந்த ஆண்டு செய்ய வேண்டாம். தர்ம சங்கடமான சூழ்நிலைகள் உருவாகும்போது அவற்றை நிதானமாகக் கையாண்டு வெற்றி பெறுங்கள். பாக்கிகளை வசூலிக்க அலைய வேண்டியிருந்தாலும் பலன் கிடைக்கும். பேச்சுத் திறமை கை கொடுக்கும். புதிய வாடிக்கையாளர்கள் கிடைப்பார்கள். அக்டோபர், பிப்ரவரி மாதங்களில் ஆதாயம் அதிகரிக்கும். இரும்பு, பெட்ரோ கெமிக்கல், மருந்து, ரியல் எஸ்டேட் வகைகளால் ஆதாயம் உண்டு.
உத்தியோகஸ்தர்கள் : பணிச்சுமை அதிகரிக்கும். என்றாலும் நிதானமாகப் பணி செய்ய வேண்டியது அவசியம். சக ஊழியர்கள் குறித்து யாரிடமும் தனிப்பட்ட முறையில் குறைப்பட்டுக் கொள்ள வேண்டாம். நம்பியவர்களே உங்களைப் பற்றிக் குறை சொல்வார்கள். சிலருக்கு விரும்பத்தகாத இடமாற்றம் உண்டு. செப்டம்பர், அக்டோபர், நவம்பர் மாதங்களில் அலுவலக சூழ்நிலை மகிழ்ச்சி தரும்.
மொத்தத்தில் இந்த குருப்பெயர்ச்சி அன்றாட வாழ்வில் சில படிப்பினைகளையும், நாசூக்காக நடந்துக் கொள்ள வேண்டிய அவசியத்தையும் அறிவுறுத்துவதாக அமையும்.
தனுசு – குரு பெயர்ச்சிப் பலன்கள்
எப்போதும் சமாதானத்தை விரும்பி சாந்தமாக உரையாடும் தனுசு ராசி அன்பர்களே… இதுவரை உங்கள் சுகஸ்தானமான மீனத்தில் அமர்ந்து பலன்தந்துகொண்டிருந்த குருபகவான் இனி பூர்வ புண்ணிய ஸ்தானமான மேஷத்தில் அடியெடுத்து வைக்க இருக்கிறார். இதுவரை எதையும் அனுபவிக்க முடியாமல் திண்டாடினீர்களே… அந்த நிலை மாறும். இழப்புகளும் ஏமாற்றங்களும் தந்த வலியிலிருந்து மீள்வீர்கள். குருபகவான் 5 ம் வீடான மேஷத்தில் 22.4.2023 முதல் 1.5.2024 அமர்ந்து பலன் தரப்போகிறார் என்பதால் இனி எதிலும் வெற்றி கிட்டும். குடும்பத்தில் இருந்துவந்த சண்டை சச்சரவுகள் நீங்கும். வீட்டில் சந்தோஷம் குடிகொள்ளும். குழந்தை பாக்கியம் எதிர்பார்த்துக் காத்திருந்த தம்பதியினருக்குக் குழந்தை பாக்கியம் கிடைக்கும். தடைப்பட்டுக்கொண்டிருந்த சுபகாரியங்கள் நடந்தேறும்.
குருபகவான் உங்கள் ராசியை 9 – ம் பார்வையால் பார்ப்பதால் நிம்மதிபிறக்கும். பழைய கடன்களை அடைப்பீர்கள். விலையுயர்ந்த ஆபரணங்கள் வாங்குவீர்கள். சிலர் வாடகை வீட்டிலிருந்து சொந்த வீட்டுக்குக் குடிபுகுவார்கள். அந்தஸ்து உயரும். மேலும் உங்கள் ராசிக்கு 9,11 ஆகிய வீடுகளையும் குருபகவான் பார்ப்பதால் சொந்தங்களால் ஆதாயம் உண்டு. புண்ணிய ஸ்தலங்களுக்குச் சென்று வருவீர்கள். வழக்குகளில் வெற்றிகிடைக்கும்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் அசுவனி நட்சத்திரத்தில் சஞ்சாரம் செய்யும் இந்தக் காலகட்டத்தில் மூலம் நட்சத்திரக்காரர்களுக்கு கொஞ்சம் அலைச்சல் அதிகரிக்கும். ஆனால் எதிர்பார்த்த காரியங்கள் தடையின்றி முடியும். வி.ஐ.பிகள் அறிமுகமாவார்கள். யோகா, தியானம் இவற்றில் ஈடுபாடு அதிகரிக்கும்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
இந்தக் காலகட்டத்தில் பரணி நட்சத்திரத்தில் குருபகவான் சஞ்சாரம் செய்ய இருப்பதால் பூராடம் நட்சத்திரக்காரர்கள் புதியவர்களை நம்பி முடிவுகள் எடுக்க வேண்டாம். என்றாலும் புதிய திட்டங்கள் நிறைவேறும். சவாலான காரியங்களைக் கூட எளிதில் முடிப்பீர்கள்.
17.4.2024 முதல் 1.5.2024 வரை
குருபகவான் உங்கள் பாக்கியாதிபதியான சூரியனின் நட்சத்திரமான கார்த்திகை 1 – ம் பாதத்தில் சஞ்சாரம் செய்யும் இந்தக் காலகட்டத்தில் புதிய வேலை கிடைக்கும். அரசால் ஆதாயமடைவீர்கள். திடீர் பணவரவு உண்டு.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
குருபகவான் வக்ர கதியில் அசுவினி மற்றும் பரணி நட்சத்திரங்களில் சஞ்சாரம் செய்யும் இந்தக் காலகட்டத்தில் சின்னச் சின்ன பிரச்னைகள் வந்து நீங்கும். வாகனப் பழுது, பணப்பற்றாக்குறை வந்து செல்லும். ஆரோக்கியத்தில் அக்கறை செலுத்துவது நல்லது.
வியாபாரிகள் : போட்டியாளர்களுக்கு மத்தியில் திணறிய வியாபாரத்தை மீண்டும் புதுப் பொலிவு பெறச் செய்வீர்கள். உங்களின் அணுகுமுறை மாறும்.கடையை விரிவுபடுத்தி நவீனமாக்குவீர்கள். சலுகைகள் மூலம் வியாபாரத்தைப் பெருக்குவீர்கள். உணவு, தங்கும் விடுதி, கமிசன், எண்டர்பிரைஸ், துணி வகைகளால் லாபமடைவீர்கள். ஜூன், ஜூலை மாதங்களில் புதிய முதலீடு செய்வீர்கள். சங்கத்தில் பெரிய பதவிக்குத் தேர்ந்தெடுக்கப்படுவீர்கள்.
உத்தியோகஸ்தர்கள் : அலுவலகத்தில் உங்கள் கை ஓங்கும். இனி சக ஊழியர்கள் மத்தியில் உங்கள் மதிப்பு கூடும். வேலைச்சுமையும் குறையும். மேலதிகாரியுடனான பனிப்போர் நீங்கும். ஜூன், செப்டம்பர், அக்டோபர் மாதங்களில் எதிர்பார்த்த பதவி உயர்வு தேடி வரும்.
மொத்தத்தில் இந்த குருப்பெயர்ச்சி வாடியிருந்த வாழ்வைவில் புது வசந்தம் வீசுவதாகவும் பணவரவையும், பதவி சுகத்தையும் தருவதாகவும் அமையும்.
மகரம் – குரு பெயர்ச்சிப் பலன்கள்
தவறு என்று தோன்றினால் தயங்காமல் தட்டிக்கேட்கும் மகர ராசி அன்பர்களே… இதுவரை உங்கள் ராசிக்கு மூன்றாம் இடமான மீனத்தில் அமர்ந்து உங்கள் முயற்சிகளை எல்லாம் முறியடித்துக்கொண்டிருந்த குருபகவான் இப்போது 22.4.2023 முதல் 1.5.2024 வரை நான்காவது வீட்டில் அமர்ந்து பலன் தரப் போகிறார்.
இனி செலவுகள் அதிகரிக்கும். வாய்வார்த்தைகளால் பிரச்னைகள் வரும். எந்த விஷயத்திலும் உணர்ச்சிவசப்படாமல் முடிவெடுக்க வேண்டியது அவசியம். குடும்பத்திலும் வெளிவட்டாரத்திலும் விவாதங்களை முற்றிலும் தவிர்த்துவிடுங்கள். மகளுக்குத் திருமணம் ஏற்பாடாகும். மகனுக்கு படிப்பில் வேலையில் நல்ல முன்னேற்றம் ஏற்படும். வெளிநாட்டு வேலைக்கு முயல்பவர்களுக்கு எதிர்பார்த்த நாட்டிலிருந்து விசா கிடைக்கும்.
குருபகவான் ராசிக்கு 8,10,12 ஆகிய ஸ்தானங்களைப் பார்ப்பதால் பலவிதங்களிலும் ஆதாயம் உண்டாகும். வேற்றுமொழி, மதத்தினரால் ஆதாயமடைவீர்கள். வெளிவட்டாரத்தில் மதிப்பு மரியாதை கூடும். எதிரிகளும் நண்பர்களாவார்கள். உணவு விஷயங்களில் கட்டுப்பாடு தேவை. அடிக்கடி அலர்ஜி அஜீரணம் ஏற்படும். பழைய வாகனத்தை மாற்றிப் புது வாகனம் வாங்குவீர்கள். உடன்பிறந்தவர்களுடன் சின்ன சின்ன உரசல்கள் வந்து நீங்கும். அநாவசிய செலவுகளைக் குறைத்துக் கொள்வது நல்லது. சுபச்செலவுகள் அதிகரிக்கும்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் அசுவனி நட்சத்திரத்தில் சஞ்சாரம் செய்யும் இந்தக் காலகட்டத்தில் கொஞ்சம் சுமாரன பலன்களே உண்டாகும். நண்பர்களைப் பகைத்துக் கொள்ள வேண்டும். குல தெய்வக் கோயிலுக்கு ஒருமுறை சென்று வழிபட்டு வாருங்கள். ஊர்க் காரியங்களில் அளவுக்கு மீறி உரிமை எடுத்துக்கொள்ள வேண்டாம்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
உங்கள் ராசிக்கு யோகாதிபதியான சுக்கிர பகவானின் பரணி நட்சத்திரத்தில் குருபகவான் சஞ்சாரம் செய்வதால் எதிர்பாராத பணவரவு, திடீர் யோகம் உண்டாகும். பழைய வாகனத்தை மாற்றிப் புது வாகனம் வாங்குவீர்கள். புதிய வீட்டுக்குக் குடிபுகுவீர்கள். தடைப்பட்ட சுபகாரியங்கள் நடந்தேறும். குழந்தை பாக்கியம் எதிர்பார்த்துக் காத்திருந்தவர்களுக்கு அந்த வரம் கிடைக்கும்.
17.4.2024 முதல் 1.5.2024 வரை குருபகவான் கார்த்திகை 1-ம் பாதத்தில் சஞ்சாரம் செய்வதால் வழக்குகளில் சாதகமான போக்கு நிலவும்.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
குருபகவான் வக்ர கதியில் அசுவினி, பரணி ஆகிய நட்சத்திரங்களில் சஞ்சாரம் செய்வதால் எதிலும் எச்சரிக்கை தேவை. கர்ப்பிணிகள் மிகுந்த கவனத்துடன் இருக்க வேண்டியது அவசியம். தூக்கம் குறையும். சுபச் செலவுகளும் அதிகரிக்கும்.
வியாபாரிகள் : வியாபாரத்தில் இருந்த சிக்கல்கள் படிப்படியாகக் குறையும். அதைப் பயன்படுத்தி அடுத்த கட்டத்துக்கு நகருங்கள். யாருக்கும் கடன் கொடுக்க வேண்டாம். வேலையாள்கள் அவ்வப்போது பிரச்னை செய்வார்கள். புதிய அணுகுமுறைகளையால் வாடிக்கையாளர்களை கவர்வீர்கள். கொடுக்கல் – வாங்கல் சுமுகமாகும். ஹோட்டல், கெமிக்கல், எண்ணெய் வகைகளால் ஆதாயமுண்டு.
உத்தியோகஸ்தர்கள் : மூத்த அதிகாரி உங்களைப் பாராட்டுவார். பதவியுயர்வு, சம்பள உயர்வு தாமதமானாலும் கிடைத்துவிடும். அயல்நாட்டுத்தொடர்புள்ள நிறுவனங்களிலிருந்து வாய்ப்புகள் வரும். புதிய சவால்களை எளிதாக சமாளிப்பீர்கள். வேலைச்சுமை அதிகரித்தாலும் அதற்கான சலுகைகள் கிடைக்கும்.
மொத்தத்தில் இந்த குருப்பெயர்ச்சி கடுமையான உழைப்பைத் தந்தாலும் புதிய பாதையில் சென்று வெற்றி பெறவும் வழிவகை செய்யும்.
கும்பம் – குரு பெயர்ச்சிப் பலன்கள்
கொள்கை, கோட்பாடுகளுடன் வாழ்ந்து பிறரையும் வாழவைக்கும் கும்பராசி அன்பர்கள்… உங்கள் ராசிக்கு இரண்டாம் வீடான மீனத்தில் அதாவது தன குடும்ப வாக்குஸ்தானத்தில் அமர்ந்து ஓரளவு நல்லபலன்களைத் தந்துகொண்டிருந்த குருபகவான் இப்போது 3 ம் வீட்டில் அடியெடுத்துவைக்கிறார். 22.4.2023 முதல் 1.5.2024 வரை மூன்றாவது வீட்டிலேயே சஞ்சாரம் செய்யும் குருபகவான் எப்படிப்பட்ட பலன்களைத் தருவார் என்று பார்ப்போம்.
நிதானமாகச் செயல்பட வேண்டிய காலம் இது. எடுத்தோம் கவிழ்த்தோம் என்று செயல்படுவது வேண்டாம். முயற்சிகள் நேரத்தில் கைகூடாமல் உங்கள் பொறுமையைச் சோதிக்கும். வீண் அலைச்சல், டென்ஷன் வந்து விலகும். குறிப்பாக விவாதங்களை முற்றிலும் தவிர்ப்பது நல்லது. குறிப்பாக சகோதர உறவுகளிடையே இணக்கத்தைப் பராமரிப்பது நல்லது.
என்றாலும் குருபகவான் உங்கள் ராசிக்கு ஏழாம் வீடான சிம்மத்தையும் ஒன்பதாம் வீடான துலாமையும் 11 வீடான தனுசையும் பார்ப்பது மிகவும் நல்ல பலன்களைக் கொடுக்கும். குருவின் பார்வையால் குடும்பத்தில் இருந்த சச்சரவுகள் நீங்கும். அன்பும் அந்நியோன்யமும் அதிகரிக்கும். கடன் தொல்லைகளில் இருந்து படிப்படியாக மீள்வீர்கள்.
கேட்ட இடத்தில் உதவி கிடைக்கும். பிதுர்வழி சொத்துகளில் இருந்த பிரச்னைகள் தீரும். பிள்ளைகள் உங்களின் சொல்கேட்டு நடப்பார்கள். மகன், மகளின் கல்வி திருமணம் ஆகிய விஷயங்களில் நல்ல முன்னேற்றம் உண்டாகும். என்றாலும் தேவையற்ற பயம் மனதில் வந்து தொந்தரவு தரும். வெளிவட்டாரத்தில் மதிப்பு மரியாதை அதிகரிக்கும். தடைப்பட்டிருந்த காரியங்கள் முடிவுக்கு வரும்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் அசுவனி நட்சத்திரத்தில் சஞ்சாரம் செய்யும் இந்தக் காலகட்டங்களில் பணவரவு அதிகரிக்கும். என்றாலும் செலவுகளும் துரத்தும். சிக்கனம் தேவை. யாருக்கும் ஜாமீன் கையெழுத்துப் போட வேண்டாம்.
23.6.2023 முதல் 22.11.2023 வரை மற்றும் 6.2.2024 முதல் 17.4.2024 வரை
உங்கள் ராசிக்கு சுகாதிபதியும், பாக்கியாதிபதியுமான சுக்கிரன் பரணி நட்சத்திரத்தில் சஞ்சாரம் செய்யும் இந்தக் காலகட்டத்தில் அரைகுறையாக இருந்த வேலைகள் முடியும். மனதிற்கு இனிய திடீர் பயணங்கள் அதிகரிக்கும். குடும்பத்தில் மூத்த உறுப்பினர்களுடன் இருந்த வருத்தங்கள் நீங்கும்.
17.4.2024 முதல் 1.5.2024 வரை
குருபகவான் கார்த்திகை 1-ம் பாதத்தில் சஞ்சாரம் செய்வதால் தேவையற்ற செலவுகள் உண்டாகும். குடும்பத்தினரின் ஆரோக்கியத்தில் அக்கறை செலுத்துவது நல்லது.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
வக்ர கதியில் குருபகவான் அசுவினி, பரணி ஆகிய நட்சத்திரங்களில் சஞ்சாரம் செய்வதால் வீடு வாகன பராமரிப்புச் செலவுகள் அதிகரிக்கும். என்றாலும் புதிய முயற்சிகளில் வெற்றி உண்டு. செல்வம், செல்வாக்குக் கூடும்.
வியாபாரிகள் : தொழிலில் மிகவும் கவனமும் அக்கறையும் அவசியம். முக்கிய விஷயங்களைப் பணியாளர்களை நம்பி ஒப்படைக்காமல் நீங்களே முடிக்கப் பாருங்கள். முதலீடுகள் விஷயத்தில் மிகுந்த எச்சரிக்கை தேவை. சந்தை நிலவரம் அறிந்து முதலீடு செய்யுங்கள். வாடிக்கையாளர்களிடம் கனிவு தேவை. முரண்டு பிடிக்கும் பழைய பணியாளர்களை மாற்றுவீர்கள். லாபம் ஓரளவுக்கு இருக்கும். ஹோட்டல், லாட்ஜ், வாகன உதிரி பாகங்கள், கமிசன் வகைகளால் லாபமடைவீர்கள். ஜூன், நவம்பர் மாதங்கள் சாதகமாக இருக்கும்.
உத்தியோகஸ்தர்கள் : அலுவலகச் சூழலில் தேவையற்ற வாக்குவாதங்கள் வந்துபோகும் என்பதால் அமைதி காப்பது நல்லது. சின்னச் சின்ன அவமானங்கள் நேர்ந்தாலும் அதைப் பொருட்படுத்த வேண்டாம். மேலதிகாரிகள் உங்களின் மதிப்பைப் புரிந்துகொள்வார்கள். முக்கியப் பொறுப்புகள் தேடிவரும். சிலருக்கு எதிர்பாராத இடத்துக்கு மாற்றப்படுவீர்கள். என்றாலும் எதிர்காலத்தில் அதனால் நன்மையே ஏற்படும். சம்பள உயர்வும் சலுகையும் மே, டிசம்பர் மாதங்களில் கிடைக்கும்.
மொத்தத்தில் இந்த குருப்பெயர்ச்சி கொஞ்சம் உங்களுக்கு அசௌகர்யங்களைக் கொடுத்தாலும் வாழ்வில் மேன்மேலும் மெருகேறவைக்கும். வெற்றிகள் கிடைக்கும்.
மீனம் – குரு பெயர்ச்சிப் பலன்கள்
அவசரப்பட்டுக் காரியம் செய்யாமல் அனைத்துக்கும் காலம் கனியும் வரை காத்திருந்து சாதிப்பவர்கள் மீன ராசிக்காரர்கள். அப்படிப்பட்ட உங்களுக்கு ராசியிலேயே அமர்ந்து மன உளைச்சலையும் தீராத சிக்கல்களையும் கொடுத்துவந்த குருபகவான், தற்போது நகர்ந்து 2 ம் இடத்துக்குச் செல்கிறார். இரண்டாம் இடம் தன குடும்ப வாக்குஸ்தானம். இது ஓரளவு நல்ல பலன்களை உங்களுக்குத்தரும். 22.4.2023 முதல் 1.5.2024 வரை குருபகவான் 2-ம் வீட்டில் அமர்வதால் மனப்போராட்டங்கள் நீங்கும். குடும்ப ஸ்தானத்தில் குருபகவான் சஞ்சாரம் செய்வதால் வீட்டில் நன்மையுண்டாகும். குடும்பத்தில் பிரிந்திருந்தவர்கள் ஒன்று சேருவீர்கள். சுபநிகழ்ச்சிகள் களைகட்டும். வரவேண்டிய தொகை கைக்குவரும். கடன்களின் ஒருபகுதியைப் பைசல் செய்வீர்கள். பெரிய நோய் இருப்பதைப்போன்ற மனபிரம்மை நீங்கும்.
குருபகவான் உங்கள் ராசிக்கு 6,8,10 ஆகிய வீடுகளைப் பார்த்துப் பலன்தர இருக்கிறார். எதிர்ப்புகள் அடங்கும். பிறமொழி பேசுபவர்களால் நன்மைகள் உண்டாகும். கடன் பிரச்னை கட்டுக்குள் வரும். எதிர்பாராத வகையில் பணவரவு உண்டாகும். அயல்நாடுப் பயணங்கள் தேடி வரும். விசா சிக்கல்கள் தீரும். கௌரவப் பதவிகள் தேடி வரும். புதிய வேலை கிடைக்கும். சுபநிகழ்ச்சிகளில் மதிப்பு மரியாதை அதிகரிக்கும்.
குருபகவானின் நட்சத்திர சஞ்சாரம்:
22.4.2023 முதல் 23.6.2023 வரை மற்றும் 23.11.2023 முதல் 6.2.2024 வரை
குருபகவான் இந்தக் காலகட்டத்தில் அசுவனி நட்சத்திரத்தில் சஞ்சாரம் செய்வதால் புது வீடு அமையும். அல்லது வசதியான காற்றோட்டம் உள்ள புதிய வீட்டுக்கு வாடகைக்குப் போவீர்கள். பங்குச்சந்தை மூலம் பணம் வரும். தங்கம் வாங்கும் யோகம் உண்டாகும். மகளுக்குத் திருமண ஏற்பாடுகள் செய்வீர்கள். போட்டிகளில் வெற்றி கிடைக்கும். உயர்கல்வி பயிலும் கனவு நனவாகும்.
23.06.2023 முதல் 22.11.2023 வரை மற்றும் 6.2.2024 முதல் 17.4.2024 வரை
குருபகவான் சுக்கிரனின் நட்சத்திரமான பரணி நட்சத்திரத்தில் சஞ்சாரம் செய்யும் இந்தக் காலகட்டத்தில் சகோதரர்களிடம் எதிர்பார்த்த உதவிகள் கிடைக்கும். பதவிகள் தேடிவரும். சொத்துப் பிரச்னைகள் முடிவுக்கு வரும். புண்ணியத் தலங்களுக்குச் சென்றுவரும் பாக்கியம் கிடைக்கும்.
17.4.2023 முதல் 1.5.2024 வரை
குருபகவான் சூரியனின் நட்சத்திரமான கார்த்திகை நட்சத்திரம் 1-ம் பாதத்தில் சஞ்சாரம் செய்ய இருபதால் செலவுகள் கட்டுக்கடங்காமல் போகும். அதேவேளையில் உங்களின் மறைமுக எதிரிகள் தோற்று ஓடுவார்கள். குடும்பம் தொடர்பான விஷயங்களில் மூன்றாம் நபருடன் கலந்து ஆலோசிக்க வேண்டாம்.
குருபகவானின் வக்ர சஞ்சாரம்: 11.9.2023 முதல் 20.12.2023 வரை
குருபகவான் வக்ர கதியில் அசுவினி மற்றும் பரணி நட்சத்திரங்களில் இந்தக் காலகட்டத்தில் சஞ்சாரம் செய்ய இருப்பதால் எதையும் எளிதில் முடிக்கும் ஆற்றல் பிறக்கும். தடைப்பட்ட திருமணம் கூடிவரும். அதே நேரம் பணிச்சுமை அதிகரிக்கும். என்றாலும் சமாளித்துவிடுவீர்கள்.
வியாபாரிகள் : இதுவரை நஷ்டத்தில் இயங்கிய உங்கள் தொழில் இனி சரியாகும். உங்கள் உழைப்புக்கேற்ற பலன் கிடைக்கும். தேங்கிக் கிடந்த சரக்குகளைச் சலுகை அறிவித்து விற்றுத் தீர்ப்பீர்கள். லாபம் கணிசமாக உயரும். பணியாளர்கள் பொறுப்புடன் நடந்துகொள்வார்கள். மே, ஜூன், ஆகஸ்டு, ஜனவரி, பிப்ரவரி மாதங்களில் லாபம் அதிகரிக்கும். ஹோட்டல், கெமிக்கல், கல்வி நிறுவனங்கள், பைனான்ஸ், கமிசன் வகைகளால் லாபமடைவீர்கள்.
உத்தியோகஸ்தர்கள்: பணிச்சுமை கொஞ்சம் குறையும். உழைப்புக்கேற்ற மரியாதையும் சலுகைகளும் கிடைக்கும். பதவி உயர்வு எதிர்பார்த்துக்காத்திருந்தவர்களுக்கு உரிய உயர்வு கிடைக்கும். மேலதிகாரி உங்களைப் பாராட்டுவார். சம்பள உயர்வு உண்டு. ஜூன், ஜனவரி, பிப்ரவரி மாதங்களில் உங்கள் திறமையை நிரூபிக்கும் நல்ல வாய்ப்புகள் தேடி வரும். முக்கியப் பொறுப்புகளை ஏற்பீர்கள்.
மொத்தத்தில் இந்த குருப்பெயர்ச்சி பழைய சிக்கலான சூழலில் இருந்து உங்களை விடுவித்து எதையும் சாதித்துக் காட்டும் வல்லமையை அள்ளித் தரும்.
