2025ம் ஆண்டு ஐபிஎல் தொடர், வரும் மார்ச் 23ம் தேதி தொடங்கும் என பிசிசிஐ துணைத் தலைவர் ராஜீவ் சுக்லா அறிவித்துள்ளார். மும்பையில் நடைபெற்ற பிசிசிஐ சிறப்பு நிர்வாகக் குழு கூட்டம் மும்பையில் நேற்று நடந்தது. கூட்டத்தில் ஐபிஎல் குறித்து ஆலோசித்து முடிவு செய்யப்பட்டது. அதைத் தொடர்ந்து பிசிசிஐ துணைத் தலைவர் ராஜீவ் சுக்லா செய்தியாளர் சந்திப்பில் கூறியதாவது:
“ஐபிஎல் 2025 சீசன் வருகின்ற மார்ச் 23ம் தேதி தொடங்குகிறது. முதல் போட்டி எந்த அணிகளுக்கு இடையே நடைபெறும் என்பது தற்போது முடிவு செய்யப்படவில்லை. அதே நேரத்தில், மகளிர் பிரிமியர் லீக் போட்டி நடைபெறும் இடங்களும் முடிவு செய்யப்பட்டுள்ளது, விரைவில் அறிவிக்கப்படும்” என தெரிவித்தார்.
மேலும் சிறப்பு நிர்வாகக் குழு கூட்டத்தில் பிசிசிஐ-ன் புதிய செயலாளராக முன்னாள் கிரிக்கெட் வீரர் தேவஜித் சைகியா நியமிக்கப்பட்டுள்ளார்.
கடந்த ஐபிஎல் சீசன் கடந்த ஆண்டு மார்ச் 22ம் தேதி தொடங்கியது. அதன் முதல் போட்டி ராயல் சேலஞ்சர்ஸ் பெங்களூரு மற்றும் சென்னை அணிகள் மோதின. மே 26-ம் தேதி நடைபெற்ற இறுதிப்போட்டியில் கொல்கத்தா மற்றும் ஹைதராபாத் அணிகள் மோதின.இறுதிப் போட்டியில் கொல்கத்தா வெற்றி பெற்று 3வது முறையாக சாம்பியனானது.