அரசு மற்றும் அரசு உதவிப்பெறும் உயர் மற்றும் மேல்நிலைப்பள்ளியில் தமிழ் வழியில் பயின்று 10 மற்றும் 12ம் வகுப்பு தேர்ச்சி பெற்று, தேர்வு மதிப்பெண்கள், கலை, இலக்கியம், விளையாட்டு, அறிவியல் கண்காட்சிகள் மற்றும் இணை செயல்பாடுகளில் (JRC, Scout, NSS, NCC, NGC மன்றங்கள்) சிறந்து விளங்கி, கூடுதல் மதிப்பெண்கள் பெறும் முதல் 15 மாணவ, மாணவிகளுக்கு ஒவ்வொரு ஆண்டும் பெருந்தலைவர் காமராஜர் விருதும் மற்றும் பாராட்டுச்சான்றிதழ்களும் 10ம் வகுப்பு மாணவர்களுக்கு ரூ.10,000 பரிசுத்தொகையும், 12 ம் வகுப்பு மாணவர்களுக்கு ரூ.20,000 பரித்தொகையும் தமிழக அரசால் வழங்கப்படுகிறது.
அதன்படி அரியலூர் மாவட்டத்தில் 2022-2023 ம் ஆண்டிற்கான 12 ம் வகுப்பு மாணவர்களுக்கான காமராஜர் விருது மற்றும் பாராட்டுசான்றிதழ்கள் 15 மாணாக்கர்களுக்கு வழங்கப்பட்டது. மேலும் தலா ரூ.20,000 வீதம் ரூ.3,00,000 பரிசுத்தொகை வழங்கப்பட்டது.
இதேபோன்று 2022-2023 ம் ஆண்டிற்கான 10 ம் வகுப்பு மாணவர்களுக்கான காமராஜர் விருது மற்றும் பாராட்டு சான்றிதழ்கள் ஆகிய 15 மாணவ, மாணவிகளுக்கு வழங்கப்பட்டது. மேலும் தலா ரூ.10,000 என மொத்தம் ரூ.1,50,000 பரிசுத்தொகையை மாவட்ட ஆட்சித்தலைவர் ஜா.ஆனி மேரி ஸ்வர்ணா வழங்கினார்.
இந்நிகழ்வில் மாவட்ட முதன்மை கல்வி அலுவலர் (பொ) சாமி முத்தழகன், ஆசிரியர்கள், மாணவ, மாணவிகள், உள்ளிட்ட பலர் கலந்துகொண்டனர்.