கோவை மாவட்டம் பொள்ளாச்சி அருகே உள்ள சேத்துமடையை சேர்ந்தவர் சதீஷ்குமார் தனியார் நிறுவனத்தில் மேலாளராக பணியாற்றி வருகிறார். இவர்கடந்த 19ஆம் தேதி பொள்ளாச்சி தேர்நிலையம் பகுதியில் உள்ள அவரது வீட்டின் முன்பு நிறுத்தியிருந்த இருசக்கர வாகனத்தை மர்ம நபர்கள் திருடி சென்றனர், இதுகுறித்து சதீஷ்குமார் கிழக்கு காவல் நிலையத்தில் புகார் கொடுத்தார்.
இதன் அடிப்படையில் வழக்குப்பதிவு செய்த போலீசார் அப்பகுதியில் பொருத்தப்பட்டிருந்த கண்காணிப்பு கேமராக்களை ஆய்வு செய்தபோது வீட்டின் வெளியே நிறுத்தப்பட்டிருந்த இருசக்கர வாகனத்தை இரண்டு நபர்கள் திருடிச் செல்லும் காட்சிகள் பதிவாகி இருந்தது. இதைதொடர்ந்து போலீசார் விசாரணையில் இருசக்கர வாகனத்தை திருடிச்சென்றது தேனி மாவட்டத்தைச் சேர்ந்த ஈஸ்வரன் (22) அவரது நண்பர்கள் விஜயரங்கநாதா (21) பிரதீப்குமார் (24) பரமன் ( 25) உள்ளிட்ட நான்கு பேர் என தெரியவந்தது. பின்னர் அவர்களை கைது செய்த போலீசார் அவர்களிடம் இருந்து இரண்டு இருசக்கர வாகனங்களை பறிமுதல் செய்தனர். மேலும் இவர்கள் வேறு திருட்டு சம்பவங்களில் ஈடுபட்டு உள்ளார்களா? என்பது குறித்து விசாரணை மேற்கொண்டு வருகின்றனர்.