Skip to content

வீட்டின் பூஜை அறையில் 17.5 சவரன் நகைகள் திருட்டு.. திருச்சி க்ரைம்…

  • by Authour

நகைகள் திருட்டு…

திருச்சி சீனிவாச நகர் 7-வது மெயின் ரோடு 6-வது கிராஸை சேர்ந்தவர் வெங்கடேசன் (63). இவர் தன் வீட்டு பூஜை அறையில், 17.5 சவரன் தங்க நகைகளை பாதுகாப்பாக இருக்கட்டும் என கருதி வைத்திருந்துள்ளார். மீண்டும் பார்த்த போது, நகை இருந்த இடத்தில் இருந்து நகைகள் மாயமாகி இருந்தன. அதோடு மர்ம நபர்கள் வீட்டின் பின்புற கதவை உடைத்து, வீட்டினுள் நுழைந்து, நகைகளை திருடி சென்றது தெரிய வந்தது. அதிர்ச்சியடைந்த வெங்கடேசன் இதுகுறித்து உறையூர் போலீஸ் நிலையத்தில் புகாரளித்தார். புகாரின் பேரில் திருட்டு சம்பவம் நடந்த இடத்தில் போலீசார் ஆய்வு மேற்கொண்டனர். தடயவியல் நிபுணர்கள், கைரேகை உள்ளிட்ட தடயங்களை பதிவு செய்தனர். போலீசார் தொடர்ந்து திருட்டு குறித்து வழக்கு பதிந்து, நகைகளை திருடி சென்ற மர்ம நபர்களை தேடி வருகின்றனர்.

மாடியில் இருந்து கீழே விழுந்து மூதாட்டி பலி 

திருச்சி கண்டோன்மென்ட் மெக்டொனால்ட் சாலையை சேர்ந்தவர் பாலகிருஷ்ணன் (64). இவரது தாய் சரோஜா(85). இவர் நேற்று காலை தன் வீட்டின் முதல் மாடி பால்கனியில் இருந்து வெளியே வேடிக்கை பார்த்துக்கொண்டிருந்தார். அப்போது வெளியில் எட்டிப்பார்த்தவர் எதிர்பாராத விதமாக மாடியில் இருந்து கீழே தவறி விழுந்தார். இதில் பலத்த காயமடைந்தவர் கண்டோன்மென்ட் பகுதி தனியார் மருத்துவமனையில் சிகிச்சைக்காக சேர்க்கப்பட்டார். அங்கு சிகிச்சை பலனின்றி இறந்தார். இதுகுறித்து போலீசார் வழக்கு பதிந்து விசாரித்து வருகின்றனர்.

ரயில்வே மேம்பாலத்தில் தவறி விழுந்து முதியவர் பலி

திருச்சி பாலக்கரை கூனி பஜார் கோரிமேடு பகுதியை சேர்ந்தவர் வேலு (45). இவரது தந்தை பாலக்கரை மார்சிங்பேட்டை ஹவுசிங் போர்டில் வசிக்கும் அன்பழகன்(70). இவர் நேற்று முன்தினம் மது போதையில் மேலப்புதுார் ரயில்வே மேம்பாலத்தில் நடந்து வந்து கொண்டிருந்தார். அப்போது எதிர்பாரதவிதமாக அங்கிருந்து தவறி கீழே விழுந்தார். இதில் படுகாயமடைந்த அன்பழகனை அப்பகுதி மக்கள் திருச்சி அரசு மருத்துவமனையில் சேர்த்தனர். அங்கு சிகிச்சை பலனின்றி அன்பழகன் இறந்தார். இதுகுறித்து வேலு கொடுத்த புகாரின் பேரில் போலீசார் வழக்கு பதிந்து விசாரித்து வருகின்றனர்.

போதை மாத்திரை விற்பனை…. 2 பேர் கைது

திருச்சி ஸ்ரீரங்கம் போலீசாருக்கு கிடைத்த ரகசிய தகவலின் பேரில் ஸ்ரீரங்கம் நரியன் தெரு பகுதியில் கண்காணிப்பை பலப்படுத்தினர். அப்போது அப்பகுதியில் சந்தேகத்துக்கு இடமளிக்கும் வகையில் நின்றிருந்த இளைஞர்கள் இருவரை பிடித்து விசாரித்த போது, இருவரும் முன்னுக்கு பின் முரணாக பதிலளித்துள்ளனர். இதையடுத்து அவர்களிடம் நடத்திய சோதனையில், இருவரிடம் இருந்தும் மொத்தம் ரூ.6 ஆயிரம் மதிப்பிலான 30 போதை மாத்திரைகளை போலீசார் கைப்பற்றினர். தொடர்ந்து இருவரிடம் இருந்தும் போதை மாத்திரைகள் மற்றும் இரண்டு டூவீலர்களை பறிமுதல் செய்த போலீசார், அவர்கள் மீது வழக்கு பதிவு செய்து சிறையில் அடைத்தனர்.

error: Content is protected !!