தமிழக பகுதிகளின் மேல் நிலவும் வளி மண்டல மேடுக்கு சுழற்சி காரணமாக, அடுத்த 6 நாட்களுக்கு தமிழ்நாடு, புதுச்சேரி மற்றும் காரைக்கால் பகுதிகளில் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும் என சென்னை வானிலை ஆய்வு மையம் தெரிவித்து இருந்தது. இந்த நிலையில், சென்னை மற்றும் புறநகர் பகுதிகளில் நேற்று இரவு முதல் விடிய விடிய கனமழை வெளுத்து வாங்கியது. இதன் காரணமாக பல்வேறு பகுதிகளில் மழைநீர் தேங்கியுள்ள நிலையில், பல்வேறு சுரங்கப் பாதைகளில் போக்குவரத்திற்கு தடை செய்யப்பட்டது. கனமழை காரணமாக விமான சேவையும் பாதிக்கப்பட்டது.
இந்த நிலையில், அடுத்த 3 நாட்களுக்கு தமிழகத்தில் மழை தொடரும் என வானிலை மைய தென் மண்டல இயக்குனர் பாலச்சந்திரன் கூறியுள்ளார். செய்தியாளர் சந்திப்பில் அவர் கூறியதாவது: தமிழகத்தில் கடந்த 24 மணி நேரத்தில் அதிகபட்சமாக திருவள்ளூர் மாவட்டம் ஜமீன் கொரட்டூரில் 14 செ.மீ. மழை பெய்துள்ளது. வெப்பநிலையை பொறுத்தவரையில், அதிகபட்சமாக பாளையங்கோட்டையில் 39.4 டிகிரி செல்சியஸ் வெப்பம் பதிவானது. தமிழகத்தின் மேல் நிலவும் வளி மண்டல கீழடுக்கு சுழற்சியால் அடுத்த இரண்டு அல்லது மூன்று நாட்களுக்கு தமிழகம் மற்றும் புதுச்சேரியில் மழை தொடரும். சென்னை புறநகர் பகுதிகளில் அடுத்த 24 மணி நேரத்திற்கு மிதமான மழை பெய்யக்கூடும். இவ்வாறு கூறினார்.