திருவாரூர் மாவட்டம் தம்பிக்கோட்டை கீழக்காடு எம்.ஜி.ஆர் நகர் பகுதியை சேர்ந்த விவசாய கூலி தொழிலாளர்கள் 45பேர் கோட்டைபட்டினத்திற்கு இன்று அதிகாலை நாற்று களை எடுப்பதற்காக இரண்டு டெம்போக்களில் சென்றனர்.
வேலை முடித்து ஒரு டெம்போ ஊர் திரும்பிவிட்ட நிலையில், மற்றொரு டெம்போ அதிராம்பட்டினம் அடுத்த நசுவினி ஆறு அருகே வந்து கொண்டிருந்தபோது திடீரென டெம்போவின் டயர் வெடித்து டெம்போ தாறுமாறாக ஓடி கவிழ்ந்தது. இந்த விபத்தில் டெம்போவில் பயணித்த அனைவரும் தூக்கி வீசப்பட்டனர். இதில் துர்கையம்மாள் க/பெ சுப்ரமணியன் (55) சம்பவ இடத்திலேயே பலியானார்.
படுகாயமடைந்த 25 பேரை மீட்ட பொதுமக்கள், அதிராம்பட்டினம் அரசு மருத்துமனைக்கு கொண்டுச்சென்றனர். அங்கு போதிய வசதிகள் இல்லாததால் உடனடியாக பட்டுக்கோட்டை அரசு மருத்துவமனைக்கு மாற்றப்பட்டனர். அங்கு அவர்களுக்கு முதலுதவி சிகிச்சை அளிக்கப்பட்டு மேல் சிகிச்சைக்காக தஞ்சாவூர் மருத்துவ கல்லூரி மருத்துவமனைக்கு அனுப்பிவைத்தனர்.
இதில் பெரும்பாலான நபர்களுக்கு கை, கால், தலை ஆகிய பகுதிகளில் பலத்த காயம் ஏற்பட்டுள்ளது. இதனிடையே தகவல் அறிந்த பட்டுக்கோட்டை கோட்டாட்சியர் ஜெயஶ்ரீ, டி.எஸ்.பி. ரவிச்சந்திரன் உள்ளிட்ட அதிகாரிகள் அரசு மருத்துவமனைக்கு விரைந்து சென்று பாதிக்கப்பட்ட பொதுமக்களுக்கு தேவையான மருத்துவ உதவிகள் வழங்கும் பணியை துரிதபடுத்தினர்.